"ვაჩვენოთ დიპლომი ყაველაშვილს“ — ამ ლოზუნგით პარლამენტის შენობასთან აქცია მიმდინარეობს.

რუსთაველის გამზირზე მყოფ დემონსტრანტებს იქ თავიანთი დიპლომები აქვთ მიტანილი, რითაც ეხმიანებიან ფაქტს, რომ მიხეილს ყაველაშვილს დიპლომი არ აქვს. ამის მიუხედავად, ქართული ოცნება მის პრეზიდენტად არჩევას აპირებს.

ეს პროცედურა პარლამენტში ამ წუთებში მიმდინარეობს, რის გასაპროტესტებლადაც პარლამენტთან უამრავი ხალხია შეკრებილი.

"ქართველ ხალხს იმისთვის არ მიგვიღია განათლება, რომ გვყავდეს უვიცი, გაუნათლებელი პრეზიდენტი, რომელიც ამავე დროს არალეგიტიმურია",— აცხადებენ ისინი.

ფოტო: მარიამ რამაზაშვილი/On.ge

პარალელურად, აქციის მონაწილეები ბურთებითაც თამაშობენ. შემთხვევითი არც ესაა, რადგან ყაველაშვილი სწორედ ყოფილი ფეხბურთელია.

"საქართველო იუმორის გრძნობას არასდროს კარგავს, რითაც ფეხბურთელის პრეზიდენტად არჩევას აღნიშნავს", — ასე გამოეხმაურა სალომე ზურაბიშვილი პარლამენტთან ბურთის თამაშს.