საპროტესტო აქციებზე დაკავებული გიორგი კუხალეიშვილი წერილს ავრცელებს. ის ამჟამად ზესტაფონის იზოლატორში იმყოფება.

გიორგი კუხალეიშვილის წერილში ნათქვამია, რომ ის შიმშილობას აგრძელებს და უკანონოდ დაკავებული ადამიანების გათავისუფლებას მოითხოვს.

"ჩემო თანამებრძოლებო, მადლობა თანადგომისთვის!

ბრძოლა გრძელდება, ვაგრძელებ შიმშილობას, მიუხედავად ჩემი ადვოკატის თხოვნისა, შემეწყვიტა შიმშილობა. შიმშილობას გავაგრძელებ, სანამ ძალები მეყოფა. დაე მე ვიყო უკანასკნელი მსხვერპლი იმ უკანონობის, იმ უსამართლობის, რაც დღეს საქართველოში ხდება!

ნუ შეშინდებით!

ღმერთმა ჩვენ ყველანი, იმ მისიით მოგვავლინა, რაც წინასწარ განგვისაზღვრა, ზოგი ცრუ მოწმედ და ცრუ დამსმენად ევლინება ამ ქვეყანას, ზოგი მოღალატედ, ზოგი ზონდერ მოსამართლედ! ვევედროთ უფალს, რომ ამ ქვეყანას ჩვენი ქვეყნის ერთგულ შვილებად მოგვავლინოს და საქართველოს ერთგულების გზა, მისი ერთგულება იყოს ჩვენი ცხოვრების მთავარი მისია!

გაუმარჯოს საქართველოს!

თავისუფლება ყველა უკანონო პატიმარს.

სიყვარულით, გიორგი კუხალეიშვილი, 13.12.2024", — ვკითხულობთ წერილში.