მსახიობ გიორგი ნაკაშიძეს სასამართლომ 2000-ლარიანი ჯარიმა დააკისრა. ის ადმინისტრაციულ სამართალდამრღვევად თბილისის საქალაქო სასამართლოს მოსამართლემ, ნინო ენუქიძემ, ცნო.

მოსამართლის გადაწყვეტილებით, გიორგი ნაკაშიძის მიმართ წვრილმან ხულიგნობაზე ადმინისტრაციული წარმოება შეწყდა და მსახიობი გამართლდა. ამის მიუხედავად, ნინო ენუქიძემ ის პოლიციელის დაუმორჩილებლობაზე სამართალდამრღვევად ცნო.

სასამართლოს სხდომაზე, რომელიც დღეს, 13 დეკემბერს გაიმართა, ორ პოლიციელთან ერთად მსახიობი და რეჟისორი ზურა გეწაზე დაიკითხა. სასამართლო პროცესს კინოსა და თეატრის სხვა მსახიობები და რეჟისორებიც ესწრებოდნენ, მათ შორის ქეთი დოლიძე.

ცნობისთვის, გიორგი ნაკაშიძე რუსთაველის გამზირზე 3 დეკემბერს დააკავეს. მას ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული ქმედების ჩადენას ედავებოდნენ, რაც წვრილმან ხულიგნობასა და პოლიციის დაუმორჩილებლობას გულისხმობს.