ბეატრის გაზდელიანი, რომელიც 7 დეკემბერს პოლიციამ რუსთაველის გამზირზე მიმდინარე საპროტესტო აქციაზე დააკავა, აცხადებს, რომ პოლიციის განყოფილებაში შეურაცხყოფა მიაყენეს.

ამის შესახებ გაზდელიანმა ჟურნალისტებთან სასამართლო პროცესის დაწყებამდე ისაუბრა:

"თავიდან დააკავეს ჩემი მეგობარი გიორგი ბრეგვაძე, რომელიც არაფერს არ აკეთებდა, უბრალოდ იდგა თავისთვის და როცა დავინახე, როგორ დააკავეს და გაათრიეს, რა თქმა უნდა, ასე არ დავტოვებდი მე ამას, დავრჩი და დავდექი იქ, სადაც ვიდექი. შემათრიეს რაღაც
"მარშრუტკაში", სადაც სიბნელე იყო და შემეშინდა მანდ ყოფნა და ვთხოვე, რომ გამოვეყვანე.

მერე ჩამსვეს საპატრულო მანქანაში. გადამიყვანეს განყოფილებაში, მოხდა ძალიან არასასაიამოვნო ფაქტი, ვიდეოს მიღებდნენ შსს-ს თანამშრომლები, ნიღბები ეკეთათ, ვიცით შენზე, რომ სტრიპტიზს ცეკვავ ჩახდილი და გახდილიო. არ ვიცი, მაგას რატომ მეუბნებოდნენ, არ ვიცოდი, რა მექნა, ძალიან საშინელება იყო. სავარაუდოდ, ჩემი წყობიდან გამოყვანაც უნდოდათ, ან შანტაჟიც. წინააღმდეგობას და დაუმორჩილებლობას მედავებიან, მაგრამ ასეთი არაფერი გამიკეთებია. არც სიტყვიერი შეურაცხყოფა არ მომხდარა ჩემი მხრიდან", — განაცხადა ბეატრის გაზდელიანმა.