კოალიცია ცვლილებისთვის ერთ-ერთმა ლიდერმა, ზურა ჯაფარიძემ განაცხადა, რომ "ოცნების" მიერ დაანონსებული ცვლილებები "პოლიციის შესახებ" კანონსა და "საჯარო სამსახურის შესახებ" კანონში, არის სტადიები ავტოკრატიული და დიქტატორული რეჟიმების.

ჯაფარიძემ ამის შესახებ ჟურნალისტებთან საუბრისას განაცხადა.

"ამ გზას ეს ქვეყანა პირველად არ გადის, ეს გზა გავლილი აქვს ყველას. ეს არის ავტოკრატიული და დიქტატორული რეჟიმების სტადიები. ხომ გასაგებია მიზანი რა არის? - ერთ შემთხვევაში მიზანი არის ის, რომ ტვინგაწმენდილი ადამიანები მარტივი წესით აიყვანონ პოლიციაში, ჩააცვან ფორმა და მისცენ ადამიანების ცემის, წამების უფლება და მეორე შემთხვევაში - სადმე, საჯარო სექტორში კრიტიკული აზრი თუ არის დარჩენილი, მარტივად გაყარონ იქიდან. ხომ გასაგებია?! ეს არის ამ ცვლილებების მიზანი! კითხვა მანდ არ არსებობს", — განაცხადა ზურა ჯაფარიძემ.

შეგახსენებთ, გუშინ, 9 დეკემბერს, "პოლიციის შესახებ" კანონში დაანონსდა დაგეგმილი ცვლილებების პროქტი, რომლის მიხედვითაც, შინაგან საქმეთა სამინისტროს ენიჭება უფლებამოსილება პოლიციაში სამუშაოდ პირი სპეციალური კურსის გავლის გარეშე მიიღოს და საკუთარი ბრძანებით, კონკურსის გარეშე, პოლიციაში მიღების წესი და პირობები განსაზღვროს.

ამასთან, ქართული ოცნების აღმასრულებელმა მდივანმა, მამუკა მდინარაძემ უმრავლესობის სხდომის დასრულების შემდეგ აღნიშნა, რომ ცვლილებები იგეგმება "საჯარო სამსახურის შესახებ" საქართველოს კანონშიც, რომლითაც რეორგანიზაციის საკითხები საჯარო სექტორში გამარტივდება.