"ოცნების" საგარეო საქმეთა მინისტრის, მაკა ბოჭორიშვილისა და საქართველოში ევროკავშირის ელჩ პაველ ჰერჩინსკის შორის შეხვედრას სამი ევროპელი პოლიტიკოსი გამოეხმაურა, რომლებმაც სოციალური ქსელის საშუალებით შეხვედრა გააკრიტიკეს.

შეხვედრას ლატვიელი დეპუტატი, რუჰარდს კოლოსი გამოეხმაურა და თქვა, რომ "ჰერჩინსკის ხელის ჩამორთმევა არ არის მხოლოდ ჟესტი, არამედ კრემლის "ოცნების" სამაშველო რგოლი".

"ერთ დღეს დაგმეს მოპარული არჩევნები საქართველოში, მეორე დღეს ჩამოართვა ხელი რეჟიმს. ელჩი ჰერჩინსკის ხელის ჩამორთმევა არ არის მხოლოდ ჟესტი - ეს არის კრემლის „ქართული ოცნების" სამაშველო რგოლი. რამდენჯერ მიანიჭებს ევროკავშირი სანდოობას მათ პროპაგანდას? მიუღებელია", — ამბობს რუჰარდს კოლოსი.

შეხვედრა კრიტიკულად შეაფასა ლიეტუვის პარლამენტის ვიცე-სპიკერმა, ჟიგიმანტას პავილიონისმაც და ჰერჩინსკის მიმართა, რომ იგი "ევროკავშირს არ წარმოადგენს".

ამის შესახებ მან სოციალურ ქსელ X-ზე დაწერა, რომელსაც საქართველოს საგარეო საქმეთა მინისტრის და საქართველოში ევროკავშირის ელჩის შეხვედრის ფოტო დაურთო.

"სირცხვილია. პაველ ჰერჩინსკი, თქვენ არ წარმოადგენთ ევროკავშირს", — დაწერა ლიეტუვის სეიმის წევრმა, ჟიგიმანტას პავილიონისმა.

თავის მხრივ შეხვედრაზე კომენტარი გააკეთა ესტონელმა დეპუტატმა, მარკო მიჰელსონმაც.

"სირცხვილია, ევროკავშირო, გაიღვიძე", — დაწერა ესტონელმა დეპუტატმა მარკო მიკჰელსონმა.

შეგახსენებთ, 9 დეკემბერს საგარეო საქმეთა სამინისტრომ გაავრცელა განცხადება, რომ "ქართული ოცნების" საგარეო საქმეთა მინისტრი, მაკა ბოჭორიშვილი საქართველოში ევროკავშირის ელჩს, პაველ ჰერჩინსკის შეხვდა. უწყებაში გამართული შეხვედრის მიწურულს, მათ ერთმანეთს ხელი ჩამოართვეს.