თბილისის სახელმწიფო უნივერსიტეტიდან საპროტესტო მსვლელობა იმართება — დემონსტრანტები საპროტესტო ბანერებით პარლამენტთან მიემართებიან.

მსვლელობაში მონაწილეობენ როგორც სტუდენტები, ისე სამოქალაქო საზოგადოების და ოპოზიციური პოლიტიკური პარტიის წარმომადგენლები. მათ მელიქიშვილის გამზირი გადაკეტეს, შესაბამისად აღნიშნულ ტერიტორიაზე საავტომობილო მოძრაობა შეწყვეტილია.

მოქალაქეების პროტესტი კვლავ "ოცნების" 28 ნოემბრის გადაწყვეტილებას ეხება, რომლის თანახმად, საქართველო 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებს

დემონსტრანტები კვლავ უცვლელად ითხოვენ ხელახალი არჩევნების დანიშვნას და პროტესტის დროს დაკავებული მოქალაქეების გათავისუფლებას.

აქციის მონაწილეებს ბანერებზე უწერიათ: "გაიფიცე" “ჩვენი ადგილი ევროპაშია” და სკანდირებენ: “საქართველოს გაუმარჯოს”.

ადგილზე მობილიზებულია საპატრულო პოლიცია.

ამასთან, შეგახსენებთ, რომ თბილისში და ქვეყნის რამდენიმე ქალაქში საპროტესტო გამოსვლები უკვე მეათე დღეა მიმდინარეობს.