"საქართველოში ვიზიტის შესაძლებლობას განვიხილავთ" — თქვა ლიეტუვის პრეზიდენტმა, გიდანას ნაუსედამ, ლატვიისა და ესტონეთის პრეზიდენტებთან ერთად გამართულ პრესკონფერენციაზე.

მისივე ინფორმაციით, კოლეგებთან შეხვედრაზე საქართველოში არსებული ვითარება განიხილა.

"უპირველეს ყოვლისა, ხაზგასმით უნდა აღვნიშნო, რომ საქართველოში არსებული ვითარება სრულიად განსხვავდება 2008 წლის ვითარებისგან, როდესაც რუსეთის ფედერაცია შეიჭრა ქვეყანაში და ქვეყნის ტერიტორიის ნაწილის ოკუპაცია მოახდინა, მაგრამ ქართული საზოგადოება ოკუპანტისა და აგრესორის წინააღმდეგ ერთად დადგა. ამჯერად, ვხედავთ, რომ ქართული საზოგადოება ორადაა გაყოფილი. ევროინტეგრაცია საქართველოს კონსტიტუციაშია დაფიქსირებული, ამიტომ ეს კონსტიტუციას ეწინააღმდეგება. ეს გაუგებარია ჩვენი და ევროკავშირის წევრი ქვეყნების გადმოსახედიდან", — აღნიშნა გიტანას ნაუსედამ.

ამასთან, მან დაგმო გასულ დღეებში, აქციის მიმდინარეობისას, მშვიდობიანი დემონსტრანტების წინააღმდეგ ძალადობა და დასძინა, რომ საქართველოს წინააღმდეგ სანქციების დაწესებას ემხრობა.

"საქართველოში დეკემბერში ვიზიტის შესაძლებლობას განვიხილავთ, ეს შესაძლებლობა კვლავ ღიაა და ამას პოლონეთის პრეზიდენტთან, ანჯეი დუდასთანაც განვიხილავთ. ვფიქრობ, რაც უფრო ერთიანები ვიქნებით საქართველოსთან დაკავშირებით, უფრო ეფექტურად შევძლებთ ევროკავშირის პოლიტიკის განხორციელებას. ეს არის მიზეზი, თუ რატომაც ვუჭერ მხარს საქართველოს წინააღმდეგ სანქციებს, რომლებიც შეიძლება ევროპის დონეზე დაწესდეს", — განაცხადა ლიეტუვის პრეზიდენტმა.

ნაუსედამ პრესკონფერენციაზე თქვა, რომ აღნიშნულ საკითხს ევროპული საბჭოს მომავალ შეხვედრაზე დააყენებს.