ინტერპრესნიუსის ინფორმაციით, "ძლიერი საქართველოს" ერთ-ერთმა ლიდერმა, ალეკო ელისაშვილმა, სამედიცინო დაწესებულება "ვივამედი" დატოვა, სადაც მას გუშინ ღამით ამბულატორიული მომსახურება გაუწიეს. ის ახლა ისევ დუშეთის დროებითი მოთავსების იზოლატორში იმყოფება, სადაც წუხელვე გადაიყვანეს.

ალეკო ელისაშვილის ადვოკატის განცხადებით, მისი ჯანმრთელობის მდგომარეობა ამჟამად უცნობია. ამის შესახებ ადვოკატ გიორგი რეხვიაშვილისთვის კლინიკას ინფორმაცია არ მოუწოდებია.

"კლინიკიდან ინფორმაციის გამოთხოვა დროს მოითხოვს. რამდენიმე საათში გვეცოდინება, როდესაც გადმოიყვანენ თბილისში, ვინაიდან დღეს პროცესი მიმდინარეობს აღკვეთის ღონისძიებასთან დაკავშირებით. გამომძიებლისგან ზარს ველოდები, სხდომა ნებისმიერ დროს შეიძლება ჩაინიშნოს", — განუცხადა მან ინტერპრესნიუსს.

ალეკო ელისაშვილი სამართალდამცავებმა "ქორთიად მარიოტთან" იმ დროს დააკავეს, როცა 4 ბარიერგადალახული ოპოზიციური პარტიის შეხვედრა დასრულდა.

დაკავების მიზეზი "საქართველოს აზერბაიჯანელთა ეროვნული კონგრესის" თავმჯდომარის, ალი ბაბაევის, განცხადებაა, სადაც წერია, რომ მას ალეკო ელისაშვილმა სიტყვიერი და ფიზიკური შეურაცხყოფა მიაყენა.