ხუთშაბათს ლიეტუვის პარლამენტმა სეიმმა მიიღო რეზოლუცია, რომელიც გმობს საქართველოში მომიტინგეების მიმართ ძალადობას და აცხადებს, რომ ქვეყანაში ოქტომბერში ჩატარებული საპარლამენტო არჩევნები უსამართლო იყო.

რეზოლუცია მოუწოდებს ევროკავშირს და მის წევრ ქვეყნებს, დააწესონ სანქციები ქართველ ოფიციალურ პირებსა და პოლიტიკურ ლიდერებზე, რომლებიც პირდაპირ თუ ირიბად პასუხისმგებელნი არიან მშვიდობიანი მოსახლეობის ძალადობრივ დარბევაზე.

"სეიმა აცხადებს, რომ საქართველოში ჩატარებული საპარლამენტო არჩევნები არ შეესაბამებოდა დემოკრატიული არჩევნების საერთაშორისო სტანდარტებს და არ იყო არც თავისუფალი და არც სამართლიანი და ამიტომ მხარს უჭერს ევროპარლამენტის მოწოდებას საქართველოში ახალი საპარლამენტო არჩევნების ჩატარების შესახებ", — ნათქვამია დადგენილებაში.

რეზოლუცია მიღებულ იქნა 109 ხმით, წინააღმდეგი კი მხოლოდ ფერმერთა და მწვანეთა კავშირის დეპუტატი ვალიუს ჯუოლასი იყო

"[სეიმი] მკაცრად გმობს საქართველოს მთავრობის ძალადობას მშვიდობიანი მომიტინგეების მიმართ თბილისსა და ქვეყნის სხვა ნაწილებში, სამოქალაქო საზოგადოებისა და მედიის წარმომადგენლების დაშინებას და მომიტინგეების უკანონო დაკავებას", — ნათქვამია დოკუმენტში.

რეზოლუცია ხაზს უსვამს, რომ ფუნდამენტური უფლებების უზრუნველყოფა ევროკავშირის ვიზალიბერალიზაციის მთავარი კრიტერიუმია და მოუწოდებს ბლოკის წევრებს გადახედონ საქართველოს უვიზო რეჟიმის სტატუსს.

დოკუმენტი ასევე მოუწოდებს საქართველოს ხელისუფლებას, გააუქმოს ე.წ. უცხოელი აგენტების კანონი, უზრუნველყოს მოქალაქეთა შეკრების უფლება და თავი შეიკავოს მათ მიმართ ძალის გაუმართლებელი გამოყენებისგან.