სოციალური სამართლიანობის ცენტრი (SJC) მეტროსადგურ თავისუფლების მოედნისა და რუსთაველის ფოიეში და მეტროს მიმდებარედ პარლამენტთან მიმდინარე საპროტესტო აქციაზე მიმავალი მოქალაქეების შემოწმებისა და დაკავების ფაქტებს ეხმაურება.

სოციალური სამართლიანობის ცენტრი წერს, რომ მეტროსადგურებთან მოქალაქეთა შემოწმება და ჩხრეკა ემსახურება არა საზოგადოებრივი წესრიგის დაცვას, არამედ მოქალაქეების დაშინებას და აყოვნებს აქციაზე მიმდინარე მოქალაქეთა ნაკადს.

SJC შსს-ს მოუწოდებს, დარჩნენ კანონის ფარგლებში და შეწყვიტონ მოქალაქეთა უფლებების უკანონო და დაუსაბუთებელი შეზღუდვა.

"პოლიცია უფლებამოსილია, რომ განახორციელოს პირის ზედაპირული შემოწმება მომხდარ დანაშაულზე ან სამართალდარღვევაზე რეაგირების ან მათი პრევენციის მიზნით.

პოლიციას, თითოეულ პირთან მიმართებით, ყველა ინდივიდუალურ შემთხვევაში, სჭირდება კანონისმიერი საფუძველი, რათა განახორციელოს მოქალაქის ზედაპირული შემოწმება და მისი ნივთის დათვალიერება, შესაბამისად, ყველა პირის შემოწმება, რომელიც პოტენციურად შესაძლოა საპროტესტო აქციაზე მიდიოდეს, უხეშად სცდება კანონით დადგენილ ჩარჩოებს.

ამასთან, ზედაპირული შემოწმება გულისხმობს მხოლოდ ტანსაცმლის გარე ზედაპირის ხელით, ან სპეციალური ხელსაწყოთი დათვალიერებას. ზედაპირული დათვალიერება არ მოიაზრებს პირადი ნივთების გახსნას და შიგთავსის შემოწმებას.

იმავე კანონის მიხედვით, საპროტესტო ატრიბუტიკა და თავდაცვის საშუალებები, როგორიცაა პირბადე, სათვალე, აირწინაღი, არ შედის აკრძალული ნივთების სიაში და მათი ფლობა მოქალაქეებს შეზღუდვის გარეშე შეუძლიათ.

მოვუწოდებთ შინაგან საქმეთა სამინისტროს წარმომადგენლებს, რომ დარჩნენ კანონის ფარგლებში და მოქალაქეებს მისცენ კონსტიტუციით გარანტირებული შეკრებისა და მანიფესტაციის უფლებით სარგებლობის შესაძლებლობა", – წერს ორგანიზაცია.