მე თვითონ ვუთხარი რომ დიახ, მე ვარ ორგანიზატორი და პასუხისმგებლობას ვიღებ ამ აქციებზე — რა თქმა უნდა, ეს არის ხალხის გადაწყვეტილება და აქცია, მაგრამ დიახ, ყველაფერ ამას ვიყენებთ ჩვენ აქციაზე, — ამის შესახებ კოალიცია ცვლილებისთვის ერთ-ერთმა ლიდერმა, ელენე ხოშტარიამ დროას ოფისში მიმდინარე საგამოძიებო მოქმედებებთან დაკავშირებით განაცხადა.

მისი თქმით, ოფისში აქვთ ყველაფერი, რაც საჭიროა იმისთვის, რომ იყოს პროტესტი — პარალონი, პლედი, "ფოერვერკი", "სნიკერსები" და კვერცხები იმისთვის, რომ პოლიციას ესროლონ.

"ძალიან მოსალოდნელი მოქმედებაა. აქ ნამდვილად გვაქვს აქციისთვის ძალიან ბევრი პარალონი, პლედი, "ფოერვერკი", "სნიკერსები", კვერცხები, პოლიციას, რომ ვესროლოთ — ყველაფერი, რაც საჭიროა იმისთვის, რომ იყოს პროტესტი. ბუნებრივია, მოვიდნენ. სასაცილოა, ლაზერებს, რაღაც საღებავებს აღრიცხავენ. მე მათ განვუმარტე, რომ ეს პოლიცია არის რუსული, ანტიკონსტიტუციური, ემსახურება ივანიშვილს და მიდის ევროპის წინააღმდეგ. ამიტომ, საერთოდ არანაირი მნიშვნელობა არ აქვს ჩემთვის რას გადაჩხრეკენ, რას იზამენ, ვის რას დააბრალებენ და წაუყენებენ. მე თვითონ ვუთხარი რომ დიახ, მე ვარ ორგანიზატორი და პასუხისმგებლობას ვიღებ ამ აქციებზე. რა თქმა უნდა, ეს არის ხალხის გადაწყვეტილება და აქცია, მაგრამ დიახ, ყველაფერ ამას ვიყენებთ ჩვენ აქციაზე", — განაცხადა ხოშტარიამ.

პოლიცია პარტია დროას ოფისში შევიდა. სამართალდამცავებმა ოფისში გარკვეული ნივთები დალუქეს.