საქართველოს პრემიერ-მინისტრი გიორგი კვირიკაშვილი თქმით, ბორჯომში მთელი ღამის განმავლობაში მძიმე ტექნიკით მუშაობა გაგრძელდება:

"მიუხედავად ჩვენი პოზიტიური მოლოდინებისა, კლიმატური პირობები გართულდა და იყო ძლიერი ქარი და გააძლიერა რამდენიმე კერა. ამ წუთებში სიტუაცია კონტროლს ექვემდებარება, მოსახლეობისთვის საფრთხე არ არსებობს. ვცდილობთ, რომ ღამის განმავლობაში გავაგრძელოთ მძიმე ტექნიკით მუშაობა იმისათვის, რომ დილისთვის მოვემზადოთ და გავაგრძელოთ მუშაობა".

პრემიერის თქმით, მათ ცოცხალი ძალისთვის ახალი აპარატურა შეიძინეს, რათა მოხდეს ცეცხლის ჩაქრობა:

"საჭიროა ინტენსიური მუშაობა მძიმე ტექნიკის მეშვეობით, რომ გავლებული თხრილების გზით მივიდეთ საცეცხლე ადგილებამდე, რათა მოვახდინოთ სახანძრო მანქანებითა და ტუმბოებით იმ კერების ჩაქრობა, საიდანაც ცეცხლის გავრცელების ყველაზე მეტი საშიშროებაა".

ბორჯომის ტყეში ხანძარი 20 აგვისტოს გაჩნდა. როგორც საგანგებო სიტუაციების მართვის სამსახურში ამბობენ, ლოკალიზებული კერები ქარის გამო კვლავ ღვივდება.