საკონსტიტუციო სასამართლოს თავმჯდომარის, მერაბ ტურავას განცხადებით, საქართველოს პრეზიდენტისა და პარლამენტის დეპუტატების სარჩელები, რომლებიც 26 ოქტომბრის არჩევნების არაკონსტიტუციურად ცნობას მოითხოვს, ერთად განიხილება.

"ეს ორი სარჩელი თითქმის ერთდროულად არის შემოსული და, შესაბამისად, ორივე სარჩელი ერთდროულად განიხილება. რასაც მე გადავხედე, შინაარსობრივად ისინი თითქმის, არა მთლიანად, მაგრამ ერთმანეთს ემთხვევა და აქედან გამომდინარე, არ არის მიზანშეწონილი მათი ცალ-ცალკე განხილვა", — განაცხადა მედიასთან საუბარში მერაბ ტურავამ.

ამ მომენტში მხოლოდ პრეზიდენტის სარჩელია დარეგისტრირებული, ხოლო დეპუტატების სარჩელი, რომელიც ფოსტით იყო გაგზავნილი, დღის განმავლობაში შემოწმდება, სავარაუდოდ, დარეგისტრირდება და ორივე სარჩელი დარეგისტრირების შემდეგ წარმოებაში მიღების ეტაპს ერთობლივად გაივლის.

სარჩელების წარმოებაში მიღების საკითხი, გამწესრიგებელი სხდომის ფარგლებში, პლენუმმა უნდა გადაწყვიტოს.