თავდაცვის ყოფილი მინისტრი, ფორმულას დამფუძნებელი, დავით კეზერაშვილი რუსეთში "დაუსწრებლად დაპატიმრებას" ეხმაურება. მისი თქმით, საყურადღებოა, რომ "ეს ბოლო ქმედება რუსეთის მხრიდან, საეჭვოდ ემთხვევა ქართული ოცნების მიერ 2008 წლის ომის გამოძიების დაწყების ცნობილ დაანონსებას".

კეზერაშვილის თქმით, კარგად ესმის, რომ "რუსეთის დანაშაულებრივი ხელისუფლების და მათი მარიონეტების" მტერია.

"შევიტყვე ჩემი რუსეთში დაუსწრებლად ,"დაპატიმრების” ამბავი. ე.წ. საქმის” დეტალები არც ვიცი და არც აქვს ჩემთვის დიდი მნიშვნელობა, რა შეთხზეს ამჯერად ჩემი დევნისა და დისკრედიტაციისთვის.

რა თქმა უნდა, ძალიან კარგად მესმის, რომ რუსეთის დანაშაულებრივი ხელისუფლების და მათი მარიონეტების მტერი ვარ და ასეთად დავრჩები მომავალშიც.

საქართველოს რუსული მთავრობა 12 წელია ცდილობს ჩემ დისკრედიტაციას და განეიტრალებას. აღძრეს არაერთი საქმე საქართველოში. აწარმოეს გაშავების კამპანიები ქვეყნის შიგნით და გარეთ. ახლა, როგორც ჩანს ,,უფროსი ძმაც” მოიხმეს დასახმარებლად.
საყურადღებოა, რომ ეს ბოლო ქმედება რუსეთის მხრიდან, საეჭვოდ ემთხვევა ქართული ოცნების მიერ 2008 წლის ომის გამოძიების დაწყების ცნობილ დაანონსებას.

შემიძლია დარწმუნებით გითხრათ, რომ ყველა ეს მცდელობა ამაოა. თავისუფალი სამყარო აუცილებლად გაიმარჯვებს", — წერს კეზერაშვილი.

შეგახსენებთ, საქართველოს თავდაცვის ყოფილ მინისტრ, დავით კეზერაშვილზე რუსმა სამართალდამცავებმა საერთაშორისო ძებნა გამოაცხადეს. მათივე ცნობით, მოსკოვის სასამართლომ კეზერაშვილს დაუსწრებლად პატიმრობა მიუსაჯა.

რუსეთის საგამოძიებო კომიტეტი კეზერაშვილს თაღლითობას ედავება.

"დავით შოთას ძე კეზერაშვილი რუსეთის ფედერაციის ძებნილთა ბაზაშია შეტანილი. ის საერთაშორისო ძებნაშია გამოცხადებული. მას თაღლითობაში ედება ბრალი, მოსკოვის სასამართლომ კეზერაშვილს დაუსწრებლად პატიმრობა მიუსაჯა," — წერია საგამოძიებო კომიტეტის განცხადებაში.

როგორც რუსული სამთავრობო მედია TACC წერს, სასამართლოში კეზერაშვილის წარმომადგენლებმა განაჩენი არ გაასაჩივრეს. რუსეთის შინაგან საქმეთა სამინისტროს ბაზაში კეზერაშვილის წინააღმდეგ 2 საქმეა აღძრული.

2016 წელს რუსეთის საგამოძიებო კომიტეტის თავმჯდომარემ, ალექსანდრ ბასტირკინმა კეზერაშვილის წინააღმდეგ გამოძიება წამოიწყო, რომელშიც ყოფილ მინისტრს 2008 წლის რუსეთ-საქართველოს ომის პერიოდში სამხედრო დანაშაულებში ედება ბრალი.

დაუსწრებლად ძებნილად გამოცხადება, დაკავება, გასამართლება და განაჩენის გამოტანა რუსეთში მიღებული პრაქტიკაა, მიუხედავად იმისა, რომ ბრალდებული რეალურად დაკავებული არ არის და ხშირ შემთხვევაში სხვა ქვეყანაში იმყოფება.

დავით კეზერაშვილი 2006-2008 წლებში საქართველოს თავდაცვის მინისტრის თანამდებობას იკავებდა. 2012 წლიდან, ხელისუფლებაში ქართული ოცნების მოსვლის შემდეგ კეზერაშვილის წინააღმდეგ რამდენიმე საქმეა აღძრული. საქართველოში ყოფილი მინისტრი ძებნილად არის გამოცხადებული.