ბათუმის სახელმწიფო უნივერსიტეტის ადმინისტრაციის წინააღმდეგობის მიუხედავად, ბსუ-ს სტუდენტები ღამეს უნივერსიტეტის შენობაში გაათევენ. ამის შესახებ NEWS.On.ge-ს სტუდენტური მოძრაობის ერთ-ერთმა წევრმა, მათე ცენტერაძემ განუცხადა. მისი თქმით, ადმინისტრაციაში უთხრეს, რომ არ მისცემდნენ ღამე შენობაში დარჩენის ნებას. მიუხედავად ამისა, სტუდენტები ჯერ ადგილზე არიან და სახლში წასვლას არ აპირებენ.

"დღესაც არ ვიცით მოგვცემენ თუ არა დარჩენის ნებას. ველოდებით, ნებისმიერ დროს ჩვენი გაყრა შეიძლება სცადონ. რაც შეეხება იმას, თუ რას ვაპირებთ, ნებისმიერი ფორმით ვიბრძოლებთ. არ ვაპირებთ, რომ ერთი დღით შემოვიფარგლოთ. ამ პროტესტს მივცემთ მასშტაბურ ხასიათს, ეს იქნება აქციები, თუ სხვა სახის პროტესტები, არ აქვს მნიშვნელობა", — ამბობს მათე ცენტერაძე.

ბათუმის სახელმწიფო უნივერსიტეტის სტუდენტების პროტესტს არჩევნების გაყალბებასთან დაკავშირებით უნივერსიტეტის ადმინისტრაციის უკმაყოფილება მოჰყვა. პროტესტისადმი მოწოდებამ უნივერსიტეტის იურიდიული ფაკულტეტის დეკანი ლევან ჯაყელი გააღიზიანა და სტუდენტებს ჩივილით დაემუქრა.

ბსუ-ში სტუდენტების პროტესტი სტუდენტების პროტესტი მოძრაობა მარტიანელების და მოძრაობა პერსპექტივის ორგანიზებით დაიწყო.