ბორჯომში, წაღვერის ტყეში, სოფელ დაბის მიმდებარე ტერიტორიაზე ტყეში ხანძრის კერები, ძლიერი ქარის გამო, გაღვივდა. ეს ინფორმაცია On.ge-ს საგანგებო სიტუაციების მართვის სამსახურის პრესსამსახურში განუცხადეს.

მათივე ინფორმაციით, ამ ეტაპზე ხანძრის ჩასაქრობი სამუშაოები შეწყვიტეს საქართველოსა და აზერბაჯანის ვერტმფრენებმა. უწყების პრესსამსახურის ინფორმაციით, სპეციალისტები ვერტმფრენებს ძლიერი ქარისა და დაკვამლიანების გამო მუშაობის რეკომენდაციას არ აძლევენ.

"ამ ეტაპზე ძნელია იმის თქმა, რამხელა ტერიტორიაზეა ხანძარი", - აღნიშნა საგანგებო სიტუაციების მართვის სამსახურის პრესსამსახურის თანამშრომელმა.

მისივე თქმით, ამ ეტაპზე, 270-მდეა გაზრდილი მეხანძრეების რაოდენობა, ვერტმფრენები კი სამუშაოებში ნებართვის მიღებისთანავე ჩაერთვებიან.

დაახლოებით 15 საათზე, On.ge-ს საგანგებო სიტუაციების სამსახურის პრესსამსახურში განუცხადეს, რომ ხანძარი ლოკალიზებული იყო.