დღევანდელი დღიდან კალანდარიშვილის მეტსახელი არის "გიორგი მშიშარა", — აცხადებს ძლიერი საქართველოს ერთ-ერთი ლიდერი ანა დოლიძე, რომელიც ამ მომენტში, ცენტრალურ საარჩევნო კომისიასთან ქალების აქციას ესწრება ლოზუნგით "დავიბრუნოთ ჩვენი ხმა".

ამის შესახებ მან მედია ინტერპრესნიუსს განუცხადა.

როგორც დოლიძე ამბობს, მთელი საქართველო ფეხზე უნდა დადგეს და ამოიღოს ხმა საკუთარი ხმის დასაცავად.

"დღეს არის ბრწყინვალე აქცია, მოვიდნენ გოგოები, დედები, ქალები. ვაჩვენოთ, რომ არავინ აპირებს დათმობას. დღევანდელი დღიდან კალანდარიშვილის მეტსახელი არის გიორგი "მშიშარა". გვყავდა გიორგი ბრწყინვალე, ახლა გვყავს გიორგი "მშიშარა" იმიტომ, რომ მშვიდობიანი 50-100 ქალის საპასუხოდ, გადაკეტეს ყველაფერი, დაგვახვედრეს 500 პოლიციელი, ჩაგვიკეტეს ჭიშკარი და შიგნით არ გვიშვებდნენ. ადმინისტრაციულ შენობაში სამუშაო საათებში შესვლა არის საჯარო. "გიორგი მშიშარავ", ხელისუფლება ვართ ჩვენ, პროევროპული მოძრაობა, პარლამენტი ვართ ჩვენ. არავინ ვაპირებთ, რომ ეს არჩევანი გავატანოთ. მთელი საქართველო ფეხზე უნდა დადგეს და ამოიღოს ხმა საკუთარი ხმის დასაცავად", — განაცხადა დოლიძემ.

შეგახსენებთ, რომ ცესკოსთან ქალების საპროტესტო აქცია მიმდინარეობს, რომლებიც 26 ოქტომბრის საპარლამენტო არჩევნების შედეგებს აპროტესტებენ და ამტკიცებენ რომ არჩევნები გაყალბდა.

შეკრებილი პროტესტის მონაწილეები არჩევნებს არ აღიარებენ და მოითხოვენ ცესკოს შენობაში დატოვონ განცხადება ხელახალი არჩევნების თაობაზე.