ამ წუთებში, ცენტრალური საარჩევნო კომისიის შენობის მიმდებარედ ქალები საპროტესტო აქციას — "დავუბრუნოთ ჩვენი ხმა" მართავენ.

აქცია ხმაურის ფონზე მიმდინარეობს, რადგანაც საპატრულო პოლიციის თანამშრომლებმა ცესკოსთან მისასვლელი კარები ძალის გამოყენებით ჩაკეტეს, რომ ქალები ცესკოს ეზოში ვერ შესულიყვნენ. აქციის მონაწილეთა წინააღმდეგობისა და რკინის ღობეზე ბრახუნის შემდეგ, ცესკომ ეზოს კარი გააღო და ქალებს ცენტრალური საარჩევნო კომისიის შენობასთან მიახლოების შესაძლებლობა მისცა.

შეკრებილებს სურთ, რომ ცესკოს კანცელარიაში დატოვონ წერილები, რომლითაც ითხოვენ, რომ გაუქმდეს საპარლამენტო ჩატარებული არჩევნების შედეგები და დაინიშნოს ახალი კენჭისყრა. ცესკოს კარგთან რამდენიმე რიგად დგანან პოლიციელები და აქციის მონაწილეებს შენობაში შესვლის შესაძლებლობას არ აძლევენ.

კოალიცია ძლიერი საქართველოს ლიდერის, ანა ნაცვლიშვილის თქმით, აქციაზე შეკრებილი ქალები მოითხოვენ ჩატარებული არჩევნების არალეგიტიმურად ცნობას და ახალი არჩევნების ჩატარებას, სადაც ყველა ადამიანს ექნება კონსტიტუციით გარანტირებული უფლება, რომ მონაწილეობა მიიღოს სამართლიან არჩევნებში.

"მოხდა ისე, რომ აღმოვჩნდით სრულ იზოლაციაში, ჩაგვკეტეს, აქციის მონაწილეების ნაწილი დარჩა ღობის მიღმა, ჟურნალისტებიც ვერ ახერხებენ შემოსვლას. ჩვენი მონაწილეები იდგნენ კარში, რის შემდეგაც პოლიცია მოვიდა, იძალადა და ჟურნალისტების, აქციის მონაწილეების ნაწილი დატოვა გარეთ.

მიზანი იყო, რომ დაგვეწერა განცხადებები ხმის ფარულობის დარღვევასთან დაკავშირებით, მაგრამ მოხდა ისე, რომ მონაწილეების დიდი ნაწილი დარჩენილია გარეთ და უსაფრთხოების მიზნით ამართლებენ ამ სპეცოპერაციის გაგრძელებას", – განაცხადა კოალიცია ცვლილებისთვის წევრმა, ანა გოგოლაძემ.