People Magazine-მა ჯონ კრასინსკი 2024 წლის ყველაზე სექსუალურ კაცად დაასახელა.

ამ პრესტიჟული ტიტულის მფლობელად კრასინსკი გუშინ, სტივენ კოლბერტის შოუში დაასახელეს. ახალი ამბავი საზოგადოებას სწორედ კოლბერტმა ამცნო და გულისტკენა გამოხატა იმის გამო, რომ ეს წოდება თავად ვერ დაიმსახურა. კრასინსკიმ მას ნუგეში სცა: "არაუშავს, შეიძლება არ ხარ წლის ყველაზე სექსუალური კაცი, მაგრამ ვის ადარდებს? ვინაა ყველაზე სექსუალური კაცი? ჩემს გარდა, რა თქმა უნდა."

შოუს მომდევნო ნაწილში კრასინსკი 80-იანების სტილში გადაღებულ ვიდეოში ვიხილეთ, სადაც კოლბერტს ასწავლის, როგორ იყოს სექსუალური. ამ ვიდეოში 2022 წლის ყველაზე სექსუალური კაცი, კრის ევანსიც მონაწილეობდა.

ჯონ კრასინსკის წინამორბედი გრეის ანატომიის ვარსკვლავი, პატრიკ დემპსი იყო — ის 2023 წლის ყველაზე სექსუალური კაცი იყო.

კრასინსკის მაყურებელი ყველაზე კარგად ამერიკულ სიტკომში The Office შესრულებული ჯიმ ჰალპერტის როლით იცნობს. მსახიობმა 2018 წელს ფილმი A Quiet Place გადაიღო, სადაც თავად მონაწილეობს ცოლთან, ემილი ბლანტთან ერთად.