ტიმოთი შალამემ ცნობილ ტელეწამყვანთან, ზეინ ლოუსთან ინტერვიუ ჩაწერა, სადაც კარიერის დასაწყისში გადამხდარი არც ისე სასიამოვნო მომენტი გაიხსენა, რომელიც, მისი აზრით, ბობ დილანთან აახლოვებს — მუსიკოსთან, რომლის როლსაც ახალ ფილმში ასრულებს.

"როცა ლაბირინთში მორბენალის ან Divergent-ის რომელიმე როლისთვის მსურდა ქასთინგზე გასვლა, ჩემი აგენტისგან ყოველთვის იმას ვისმენდი, რომ როლისთვის "შესაფერისი სხეული" არ მქონდა. ის სულ მეუბნებოდა, რომ წონაში უნდა მომემატებინა," — უამბო შალამემ ლოუს.

მიუხედავად იმისა, რომ 2010-იანი წლების დისტოპიურ ფილმებში ტიმოთი შალამე ვერ ვიხილეთ, მისი კარიერა მაინც საოცრად წარმატებული გამოდგა. მომდევნო თვეში მისი მონაწილეობით ახალი ფილმი გამოდის, რომელსაც გულშემატკივართა და კრიტიკოსთა მთელი არმია ელოდება. A Complete Unknown მუსიკის ამერიკელი ლეგენდის, ბობ დილანის შესახებ გადაღებული ბიოგრაფიული ნამუშევარი იქნება.

ფოტო: Screen Rant

"ჩემი ცხოვრებისეული გამოცდილებების გამო მესმის, რისი გავლა მოუწია ბობ დილანს. ბობს სურდა, რომ როკ ენ როლის ვარსკვლავი გამხდარიყო, ბადი ჰოლის, ლითლ რიჩარდისა და ელვის პრესლის მსგავსად, ყოფილიყო ისეთი არტისტი, რომლებიც ახალგაზრდებს მოსწონდათ 50-იანებში. მეც ზუსტად მსგავსი წარმატება მინდოდა — დიდი კინოვარსკვლავი რომ გავმხდარიყავი," — ამბობს შალამე.

დილანის მსგავსად, შალამემაც ისწავლა, რომ კარიერის შენების პროცესში იმ პროექტებზე უნდა ემუშავა, რომლებთანაც ინდივიდუალურ ემოციურ კავშირს იგრძნობდა. "როგორღაც ძალიან საჩემო, პერსონალიზებულ ფილმებში მივიღე მონაწილეობა და ჩემი თავი ვიპოვე. დილანისთვის ეს ფოლკის ჟანრი აღმოჩნდა. მინესოტაში მან როკ ენ როლის ბენდი ვერ შეინარჩუნა, რადგან ყველა მუსიკოსს, რომელთაც თანამშრომლობდა, უფრო მდიდარი ახალგაზრდები ასაქმებდნენ. ჩემთვის ეს გზა იყო ისეთი უნიკალური სტილის ფილმების აღმოჩენა, როგორებიც იყო Call Me By Your Name, Beautiful Boy, Lady Bird, Little Women... ამ ფილმებს შედარებით დაბალი ბიუჯეტი ჰქონდათ, თუმცა არტისტული თავისუფლება მენიჭებოდა და მათი მორგება ჩემს თავზე შემეძლო. ამ დროს ვიპოვე ჩემი რიტმი, თავდაჯერებულობა, მოძრაობა, რაც გინდათ, ის დაუძახეთ," — ასე დააკავშირა თავისი გამოცდილება ბობ დილანის ცხოვრებასთან მსახიობმა.