"ევროპული საზოგადოება სრულად არის ინფორმირებული არჩევნების ტოტალურად გაყალბებასთან დაკავშირებით და ელოდებიან ოპოზიციისგან ამის დოკუმენტურ დადასტურებას", — ამის შესახებ ევროკავშირის ელჩთან შეხვედრის შემდეგ კოალიცია ცვლილებისთვის ხელმძღვანელმა, ნიკა გვარამიამ განაცხადა.

ოპოზიციის ლიდერები ევროკავშირის წარმომადგენლობის ოფისში ევროკავშირის ელჩთან ორი საათის მანძილზე მართავდნენ შეხვედრას. მათი განცხადებით, დახურული შეხვედრის მთავარი თემა გაყალბებული არჩევნები და ოპოზიციის ხედვის განხილვა იყო — როგორ აპირებენ მოქმედებას უახლოეს მომავალში.

ოპოზიციის ლიდერების განმარტებით, ის ფაქტი, რომ საქართველოში ჩატარებული არჩევნები ამ დრომდე ევროკავშირის არც ერთ წევრ ქვეყანას არ უღიარებია, ქვეყანას საერთაშორისო იზოლაციის საფრთხის წინაშე აყენებს.

"ეს იყო სასარგებლო და ინფორმატიული საუბარი ევროკავშირის ელჩთან იმაზე, თუ რა ხდება ქვეყანაში, რა მტკიცებულებები არსებობს საარჩევნო პროცესი მიტაცებასთან დაკავშირებით და რა შეიძლება ევროკავშირმა ქართველი ხალხისთვის გააკეთოს. ვფიქრობ, საკმარისი მტკიცებულებები არსებობს არა მხოლოდ იმასთან დაკავშირებით, რომ გაყალბება მოხდა, არამედ იმაზე, რომ მთლიანად მიტაცებული იყო არჩევნების პროცესი, ტოტალურად დარღვეული იყო ადამიანების კონსტიტუციური უფლება ხმის ფარულობასთან დაკავშირებით", — განაცხადა კოალიცია ძლიერი საქართველოს ერთ-ერთმა ლიდერმა, ბადრი ჯაფარიძემ.

ოპოზიცია აცხადებს, რომ მათ ევროკავშირის ელჩს ქართველი ხალხის გზავნილი გადასცეს, რომ საქართველო არის ევროპული მომავლის მტკიცე მხარდამჭერი.

"განხილვის ერთ-ერთი საგანი იყო საერთაშორისო გამოძიების საკითხი. ყველას ძალიან კარგად ესმის, რომ საქართველოს პროკურატურის პირობებში შეუძლებელია დამოუკიდებელი გამოძიების ჩატარება, სახელმწიფოს ყველა ინსტიტუტი, გარდა საპრეზიდენტო ინსტიტუტისა, არის მიტაცებული და ივანიშვილის ტოტალური კონტროლის ქვეშ. ამიტომ გამოძიება შეიძლება ჩატარდეს მხოლოდ საერთაშორისო აქტორების მეშვეობით და ყველაზე მიზანშეწონილია ევროკავშირის ჩართულობა, რადგან საქართველო არის ევროკავშირის წევრობის კანდიდატის სტატუსის მფლობელი ქვეყანა", — აღნიშნა ერთიანობა ნაციონალური მოძრაობის ლიდერმა, თინა ბოკუჩავამ.

შეხვედრას არ ესწრებოდნენ გიორგი გახარიას პარტიის წარმომადგენლები.