ქარიშხლიანი უღელტეხილის ეკრანიზაციის უფლების მოსაპოვებლად კინოსტუდიების დაძაბული ბრძოლა Warner Bros.-ის გამარჯვებით დასრულდა. რეჟისორ ემერალდ ფენელის ფილმზე, რომელშიც მთავარ როლებს მარგო რობი და ჯეიკობ ელორდი შეასრულებენ, კომპანიამ $80 მილიონის სანაცვლოდ მიიღო უფლებები.

უცნაური ამ ამბავში ისაა, რომ ბრძოლაში სტრიმინგ გიგანტი ნეტფლიქსი დამარცხდა, თანაც $150-მილიონიანი წინადადებით. პროექტის ხელმძღვანელებმა, მათ შორის, რობიმ, რომელიც ამავდროულად პროდიუსერია, კინოდისტრიბუცია და მარკეტინგული კამპანიის ჩატარება Warner Bros.-ს მიანდვეს.

ჰოლივუდის ერთ-ერთი აგენტის ცნობით, ნეტფლიქსი შედეგით "გაოგნებულია", რადგან კომპანია აქამდე თითქმის ყოველთვის იგებდა მსგავს ბრძოლებს სოლიდური შეთავაზების წამოყენებით. ამერიკულ მედიაში წერენ, რომ აღნიშნული შემთხვევა კინოინდუსტრიაში ტენდენციების ცვლილებაზე მიანიშნებს: ფილმის შემქმნელები უკვე ტრადიციულ პრემიერას ამჯობინებენ და უარს ამბობენ, ნამუშევარი პირველად სტრიმინგ პლატფორმაზე განათავსონ, იმის მიუხედავად, რომ ამ უკანასკნელმა შეიძლება უფრო დიდ აუდიტორიაზე გაიყვანოს.

"ნეტფლიქსს გამომწერების უდიდესი რაოდენობა ჰყავს და მასშტაბითაც ყველაზე დიდია, რაც საშუალებას აძლევს, თამაში საკუთარი წესებით წარმართოს. თუმცა, იზრდება იმ რეჟისორებისა და კინოვარსკვლავების რიცხვიც, რომლებიც მათ წინადადებაზე თავაზიანი უარით პასუხობენ", — აღნიშნავს ანალიტიკოსი ერიკ ჰენდლერი.

ფოტო: Rafael Henrique / SOPA Images / LightRocket / Getty Images

ტენდენციების ცვლილების შესაბამისად ამჯობინებენ მოქმედებას ის რეჟისორებიც, რომლებსაც უკვე გაფორმებული აქვთ ნეტფლიქსთან კონტრაქტი. მაგალითად, გრეტა გერვიგი, რომელიც კომპანიისთვის ნარნიის ქრონიკების ორი კინოეკრანიზაციის გადაღებას აპირებს, გავრცელებული ცნობით, ამჟამად მოლაპარაკებებს აწარმოებს, რომ ფილმები მაყურებელმა ჯერ კინოთეატრებში იხილოს. ეს გერვიგის წინა ნამუშევრის, ბარბის, კომერციულ წარმატებასაც უკავშირდება: ფილმმა $1,45 მილიარდამდე გამოიმუშავა.

აი, ქარიშხლიანი უღელტეხილის გადაღებები კი 2025 წლის დასაწყისში აიღებს სტარტს. ეს გეგმა ალბათ ცოტათი მოუხერხებელი იქნება ჯეიკობ ელორდისთვის, რომელიც ზუსტად ამ პერიოდში იწყებს სერიალ ეიფორიის მე-3 სეზონზე მუშაობას.

ქარიშხლიანი უღელტეხილის მორიგი ეკრანიზაციის ამბავი ივლისის თვეში შევიტყვეთ, როცა გასული წლის გახმაურებული ფილმის, Saltburn-ის, რეჟისორმა, ემერალდ ფენელმა, მომავალი პროექტის შესახებ სოციალური ქსელით გვაცნობა. მალევე გაირკვა ფილმში მონაწილე მსახიობების ვინაობაც; აღსანიშნავია, რომ ელორდი, რომელიც ჰითკლიფს განასახიერებს, Saltburn-შიც მთავარ როლს ასრულებდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...