სამოქალაქო მოძრაობა თავისუფლებისთვის მუნიციპალურმა ინსპექციამ, საკუთარი ოფისის აივანზე საპროტესტო ბანერის "რუსულმა ოცნებამ არჩევნები მოიპარა" გადმოფენის გამო, 1 500 ლარით დაჯარიმების შემდეგ, განმეორებით 3000 ლარით დააჯარიმა.

"დღეს დაგვაჯარიმეს ხელმეორედ, არ ვიყავით ოფისში, დაგვირეკეს და გვაცნობეს, რომ 3000 ლარით დაგვაჯარიმეს. არ ჩამოგვიხსნია, არ ჩავიბარეთ ის ოქმიც და არ ვაღიარებთ და არ ვემორჩილებით ამ განკარგულებას. ბანერის ჩამოხსნას, რა თქმა უნდა, არ ვაპირებთ", — აცხადებს ჩვენთან საუბრისას ორგანიზაციის ერთ-ერთი დამფუძნებელი თამარ მიქაძე.

მისივე თქმით, 5 ნოემბერს აღნიშნული ბანერი უკანონო რეკლამად დააიდენტიფიცირეს და პირველ ჯერზე 1500 ლარით დააჯარიმეს, მაგრამ გააფრთხილეს, ჩამოეხსნათ, წინააღმდეგ შემთხვევაში 3 000 და 5 000-ით ლარით დააჯარიმებდნენ. ორგანიზაციაში აცხადებენ, რომ ეს არ იყო და არ არის უკანონო რეკლამა, ის საპროტესტო ბანერია.

"ჩვენი ორგანიზაციის აივანზე გადავფინეთ ბანერი წარწერით, "რუსულმა ოცნებამ არჩევნები მოიპარა" და ამაზე მუნიციპალურმა ინსპექციამ დაგვაჯარიმა 1 500 ლარის ოდენობით, მათ ეს ბანერი დააიდენტიფიცირეს, როგორც უკანონო რეკლამა. ჩვენ მათ ვუხსნიდით, რომ ეს არის საპროტესტო ბანერი და ჩვენი პროტესტის ფორმა. მათ გაგვაფრთხილეს, რომ თუ ამ ბანერს არ ჩამოვხსნიდით კიდევ მოვიდოდნენ და დაგვაჯარიმებდნენ ჯერ 3 000-ით, 5 000-ით და ა.შ" — უთხრა NEWS.On.ge-ის ორგანიზაციის ერთ-ერთმა დამფუძნებელმა თამარ მიქაძემ.