პარტია გახარია — საქართველოსთვის მიმართვას ავრცელებს. პარტიის განცხადებით, ცესკო, პროკურატურა და ქართული ოცნება არჩევნების გაყალებებასთან დაკავშირებით გამოძიების პროცესში მტკიცებულებების ფალსიფიკაციას ერთობლივად ცდილობენ.

"როგორც მოსალოდნელი იყო, ცესკოსთან ერთად პროკურატურაც ჩაერთო სიების და სხვა მტკიცებულებების ფალსიფიკაციის პროცესში. სასამართლომ არ დააკმაყოფილა ჩვენი მოთხოვნა ცესკოს სერვერებზე და ხმის მიცემის აპარატებში არსებული მონაცემების გადაუდებელი აუცილებლობით დაცვაზე, ხოლო პროკურატურა ყალბი გამოძიების ფარგლებში ცდილობს ვერიფიკაციის აპარატების წაღებას", — ვკითხულობთ პარტიის განცხადებაში.

განცხადებაში ვკითხულობთ, რომ არსებობს მტკიცებულებების განადგურების მაღალი ალბათობა, რაც ობიექტური გამოძიების ალბათობას ნულამდე დაიყვანს, რადგან ვერიფიკაციის აპარატები და მათში არსებული ინფორმაცია, შესაძლოა, გაყალბების მთავარი მტკიცებულება იყოს.

"ეს ნიშნავს იმას, რომ შესაძლოა არჩევნების გაყალბების უმნიშვნელოვანესი მტკიცებულებები განადგურდეს, რაც აზრს უკარგავს ნებისმიერ ობიექტურ გამოძიებას, ნამდვილი სიების გამოქვეყნებას, რაც თავის მხრივ სისხლის სამართლის დანაშაულია. როგორც თავიდანვე ვამბობდით, ვერიფიკაციის აპარატები და მათში არსებული ინფორმაცია შესაძლოა იყოს გაყალბების მთავარი მტკიცებულება. ამიტომ ცდილობს პროკურატურა კონტროლის აღებას ყალბი გამოძიების ფარგლებში და ფაქტობრივდ მძევლად აჰყავს როგორც მტკიცებულებები, ისე სიმართლის დადგენის მთლიანი პროცესი", — აცხადებს პარტია გახარია — საქართველოსთვის.

ცესკოს პერსონალურ მონაცემთა კანონი, მაღალი საჯარო ინტერესიდან გამომდინარე, ავალდებულებს ამ მონაცემების გასაჯაროებას. ამის ნაცვლად, ცესკო თითქმის 10 დღეა ინფორმაციას მალავს და შენახვის ვადას არ ასახელებს.