"მე ვარ ერთ-ერთი ყველაზე პოპულარული პოლიტიკოსი უკრაინაში. ზოგადად ვფიქრობ, რომ უკრაინაში ახალი თაობის უკრაინელების ტალღა მოდის. მე არ ვითხოვ პოზიციას საკუთარი თავისთვის. მე ვხედავ საკუთარ თავს როგორც ყინულის მტეხავს," - ეს განცხადება საქართველოს ექს-პრეზიდენტმა, მოქალაქეობის გარეშე დარჩენილმა მიხეილ სააკაშვილმა BBC-ის გადაცემა HARDtalk-ში გააკეთა.

ჰარდთოქის წამყვანმა, სტივენ საკურმა სააკაშვილს მის ამბიციებზე ჰკითხა და უთხრა, რომ ოდესაში კორუფციასთან ბრძოლის ნაცვლად, ბევრი უკრაინელის აზრით, გუბერნატორი კიევში პოლიტიკის თამაშით იყო დაკავებული:

"თქვენს ნარატივს ძალიან ბევრი ნაპრალი აქვს. ერთ-ერთი ყველაზე დიდი ნაპრალია, როცა ამბობთ, რომ კორუფციისგან წმენდდით რეგიონს, მაგრამ პოროშენკომ შეგაჩერათ, რადგან თქვენი ეშინია. თქვენ ამბობთ, რომ პოროშენკოს ეშინია თქვენი ახალი მოძრაობის, რომელიც უკრაინაში დააფუძნეთ. რატომ უნდა ეშინოდეს, როდესაც საზოგადოებრივი აზრის ბოლო გამოკითხვებით ორპროცენტიანი რეიტინგი გაქვთ?"

ამ კითხვაზე კი მიხეილ სააკაშვილმა უპასუხა, რომ ის უკრაინაში ერთ-ერთი ყველაზე პოპულარული პოლიტიკოსია და ამაზე არავინ კამათობს.

26 ივლისს ამერიკაში ვიზიტისას სააკაშვილს ორი წლის წინ მიცემული მოქალაქეობა ჩამოართვეს, რაც ნიშნავს იმას, რომ ანულირებულია მისი პასპორტიც. მიუხედავად ამისა, შემდეგ სააკაშვილი პოლონეთსა და ლიტვაში ჩავიდა.

სააკაშვილი უკრაინაში დაბრუნებას 10 სექტემბერს გეგმავს. ამჟამად ის ვარშავაში იმყოფება. მისი თქმით, ის უკრაინაში, კერძოდ ლვოვში პოლონეთის ტერიტორიიდან შევა, მასთან ერთად კი საზღვარზე იქნებიან პოლონეთში მცხოვრები უკრაინელები და სხვა პოლიტიკოსები. მისივე თქმით, ის კიევიდან ოდესაშიც გეგმავს დაბრუნებას.