საქართველოს ყოფილმა პრეზიდენტმა, მიხეილ სააკაშვილმა ფეისბუქის საკუთარ გვერდზე, პირდაპირ ეთერში ჩართვისას საზოგადოებას უკრაინაში დაბრუნების გეგმა გააცნო და თქვა, რომ ის 10 სექტემბერს გეგმავს ქვეყანაში შესვლას. მიხეილ სააკაშვილი ამჟამად ვარშავაში იმყოფება.

სააკაშვილის თქმით, ის უკრაინაში, კერძოდ ლვოვში პოლონეთის ტერიტორიიდან შევა, მასთან ერთად კი საზღვარზე იქნებიან პოლონეთში მცხოვრები უკრაინელები და სხვა პოლიტიკოსები:

"მე ვცხოვრობ უკრაინაში, ჩემი სახლი უკრაინაშია, მე ვარ ერთ-ერთი უკრაინული მოძრაობის შექმნის ინიციატორი, ჩემი ნივთები უკრაინაშია, ჩემი მეგობრები უკრაინაში ცხოვრობენ და მართალია, მე წამართვეს ყველაფერი არაადამიანურად და არაკაცურად, მაგრამ გადავიტან. ბევრი უკრაინელი მწერს, რომ მზად არიან მიმიღონ".

სააკაშვილმა ცხელი ხაზის ნომერი გააცნო საზოგადოებას და მოუწოდა ხალხს, რომ შეუძლიათ მითითებულ ნომერზე დაკავშირება.

მისივე თქმით, ის კიევიდან ოდესაშიც გეგმავს დაბრუნებას.

26 ივლისს ამერიკაში ვიზიტისას პოროშენკომ სააკაშვილს ორი წლით წინ მიცემული მოქალაქეობა ჩამოართვა, რაც ნიშნავს იმას, რომ ანულირებულია მისი პასპორტიც. მიუხედავად ამისა, შემდეგ სააკაშვილი პოლონეთსა და ლიტვაში ჩავიდა.