მმართველი პარტია საარჩევნო დარღვევებთან დაკავშირებით საჩივრების განხილვას მხოლოდ ცესკოში აპირებს და საერთაშორისო გამოძიების წინააღმდეგია. ამის შესახებ პარლამენტის თავმჯდომარემ, შალვა პაპუაშვილმა განაცხადა.

პარლამენტის თავმჯდომარემ ეს განცხადება დარღვევების საერთაშორისო გამოძიებაზე აშშ-ის სახელმწიფო დეპარტამენტის და ადგილობრივი არასამთავრობო ორგანიზაციების განცხადებების საპასუხოდ გააკეთა. პაპუაშვილის თქმით, ერთადერთი რაც შეიძლება გაკეთდეს, ეს საჩივრების განხილვაა.

"ამ ქვეყანაში მოქმედებს საქართველოს იურისდიქცია და არა რომელიმე სხვა ქვეყნის. ქართული ადმინისტრაცია და სასამართლო არის უმაღლესი სტანდარტის… საშინაო გამოძიებას რას ერჩიან? ასე არ ენდობოდნენ რუსთავი 2-ის საქმეზე სასამართლოს, ასე არ ენდობოდნენ გვარამიას, მელიას, სააკაშვილის საქმეებზე. [სტრასბურგის სასამართლოში] ხომ აღმოჩნდა, რომ ეს იყო ცრუ ბრალდებები, ქართული მართლმსაჯულება იყო მართალი და მის მიმართ ბრალმდებლები იყვნენ მტყუანი? ჩვენ ძალიან კარგი საშინაო გამოძიებები გვაქვს ყველაფერთან დაკავშირებით, თუკი რაიმე საჭირო არის და უპირველეს ყოვლისა, აქ იგულისხმება საჩივრების განხილვა ცესკო-ში", — განაცხადა პაპუაშვილმა.

აშშ-ის სახელმწიფო დეპარტამენტის პრესსპიკერმა, მეთიუ მილერმა განაცხადა, რომ ვაშინგტონი ევროპელ პარტნიორებთან განიხილავს, რომელია შესაბამისი ორგანო, რომელმაც საარჩევნო დარღვევების გამოძიება უნდა ჩაატაროს.