პოლონეთის პრეზიდენტმა ანჯეი დუდამ პოლონურ რადიო ZET-თან საუბარში საქართველოში არჩევნების ირგვლივ არსებულ სიტუაციაზე ისაუბრა. ჟურნალისტის კითხვაზე, აპირებს თუ არა ახლო მომავალში საქართველოში ჩამოსვლას, როგორც ეს პრეზიდენტმა ლეხ კაჩინსკიმ გააკეთა, დუდამ უპასუხა, რომ არ გამორიცხავს, თუ ამის საჭიროება დადგება.

პოლონეთის პირველმა პირმა აღნიშნა, რომ ის საერთაშორისო დამკვირვებლების მოსაზრებას ელოდება.

"ქალბატონმა პრეზიდენტმა, ასევე მეზობელი ქვეყნის პრეზიდენტებმა საერთაშორისო გამოძიება მოითხოვეს. მეც ვფიქრობ, რომ ასეთი გამოძიება, საერთაშორისო დამკვირვებლების აზრების საფუძვლიანი შესწავლის ნიადაგზე საჭიროა", — განაცხადა დუდამ.

ანჯეი დუდამ ისაუბრა საქართველოს პრეზიდენტის ვიზიტზე, რომელიც 1 თვის წინ შედგა. მისი თქმით, პრეზიდენტებმა ისაუბრეს საქართველოში არსებულ პოლიტიკურ სიტუაციაზე.

"მან მითხრა, რომ ქართული ოცნება, სავარაუდოდ, გაიმარჯვებდა, თუმცა არ არსებობდა იმის ნიშნები, რომ ისეთ უპირატესობას მოიპოვებდა, რომ ქვეყანა ერთპიროვნულად ემართა. გამოქვეყნებული შედეგები აშკარად იმის საწინააღმდეგოა, რაც მე პრეზიდენტმა მითხრა", — განაცხადა ანჯეი დუდამ.

ანჯეი დუდა პრეზიდენტს არჩევნების შემდეგაც ესაუბრა და ეს რადიოსთან ინტერვიუშიცაა აღნიშნული.

"პრეზიდენტმა მე მითხრა, რომ, მისი რწმენით, არჩევნები მრავალ დონეზე დამახინჯდა, შედეგები მნიშვნელოვნადაა დამახინჯებული", — აღნიშნა პრეზიდენტმა დუდამ.

კითხვაზე, ჩაერია თუ არა პუტინი ამ პროცესებში, დუდა ამბობს, რომ სალომე ზურაბიშვილს ამაზე გადაჭრით დადებითი პასუხი არ გაუცია, რადგან ამის უტყუარი მტკიცებულება არ არსებობს, თუმცა დუდას აზრით, პრო-რუსული ძალები არსებობენ და "თავი არ უნდა მოვიტყუოთ".

"საქართველო მსოფლიოს საკვანძო ადგილას მდებარეობს, ევროპისა და აზიის გზაჯვარედინზე, ზღვებს შორის არსებულ ვიწრო დერეფანში, რეგიონში, რომელსაც დიდი სტრატეგიული მნიშვნელობა აქვს, ახლოსაა ირანთან, თურქეთთან, აზერბაიჯანთან და რუსეთთან", — აღნიშნა დუდამ.

ბოლოს კი პოლონეთის პრეზიდენტმა დაამატა, რომ საქართველო ძალიან მნიშვნელოვან ადგილზე მდებარეობს მსოფლიოსთვის და ამის გამო რუსეთს მისი დაპყრობა უნდა.