დარწმუნებული ვარ, გაირკვევა, რომ Concentrix Georgia არის კომპანია, რომელიც აკეთებს ღირებულ BPO ბიზნესს და ეს არ არის არალეგალური საქმიანობა, — ასე გამოეხმაურა ვიცე-პრემიერი და ეკონომიკისა და მდგრადი განვითარების მინისტრი, ლევან დავითაშვილი ამერიკულ კომპანია, Concentrix Georgia-ში ფინანსთა სამინისტროს საგამოძიებო სამსახურის თანამშრომლების შესვლას.

"Concentrix Georgia არის კომპანია, რომელიც მოღვაწეობს BPO (business process outsourcing) სექტორში. დაგეთანხმებით, "აწარმოე საქართველოს" პროექტის ფარგლებში გვქონდა შესწავლილი ეს სექტორი. ჩავთვალეთ, რომ ეს იყო დასაქმების კარგი წყარო და ავტორიტეტული საერთაშორისო BPO კომპანიების შემოყვანა მოვახერხეთ ქვეყანაში, რომლებმაც, რა თქმა უნდა, დასაქმებას ხელი შეუწყო. თუმცა თქვენ იცით, რომ მეორე მხრივ ასევე აქტუალურია ე.წ. დანაშაულებრივ ქოლცენტრებთან ბრძოლა, რომელსაც სამართალდამცავები აწარმოებენ იმისთვის, რომ ასეთი კრიმინალური საქმიანობა ქვეყანაში არ არსებობდეს. დარწმუნებული ვარ, გაირკვევა, რომ ეს არის კომპანია, რომელიც აკეთებს ღირებულ BPO ბიზნესს და ეს არ არის არალეგალური საქმიანობა. შესაბამისად, სამართალდამცავების პრეროგატივაა, რომ გაარკვიონ რა ხდება ამ კომპანიასთან დაკავშირებით. იგივე შემიძლია გითხრათ სხვა ორგანიზაციებშიც თუ ასეთი ტიპის შემოწმებები ხორციელდება, ბუნებრივია დეტალური ინფორმაცია არ გამაჩნია და ამაზე სამართალდამცავები უფრო დეტალურ ინფორმაციას მოგაწვდიან", — განაცხადა ლევან დავითაშვილმა.

შეგახსენებთ, რომ დღეს, 24 ოქტომბერს, 2 საათის განმავლობაში, ფინანსთა სამინისტროს საგამოძიებო სამსახურმა თბილისსა და ქუთაისში რამდენიმე პირის სახლში და ორგანიზაციაში ჩაატარა ჩხრეკა. მათ შორის — Atlantic Council-ის თანამშრომლების, სოფო გელავას და ეთო ბუზიაშვილი, იუმორისტი ძმების სანდრო და ონისე ცხადაძეების და ქუთაისში — მოქალაქე ვალერი ტყეშელაშვილის სახლებში.