დღეს, 24 ოქტომბერს, 2 საათის განმავლობაში, ფინანსთა სამინისტროს საგამოძიებო სამსახურმა თბილისსა და ქუთაისში რამდენიმე პირის სახლში და ორგანიზაციაში ჩაატარა ჩხრეკა.

I ჩხრეკა

ჩხრეკის შესახებ ინფორმაცია ჯერ პარტია ფედერალისტების წევრმა, გიორგი ნონიაშვილმა სოციალურ ქსელში გაავრცელა. მისი თქმით, ჩხრეკა მისი ცოლის, რუსული დეზინფორმაციის მკვლევარ სოფო გელავას სამსახურს — Atlantic Council-ს უკავშირდებოდა.

"ჩემთან სახლში მიმდინარეობს ჩხრეკა-ამოღება. მიაქვთ ოჯახიდან ყველა დივაისი. ბავშვის ლეპტოპიც. ჩემიც. საფუძველი — Atlantic Council-თან დაკავშირებით რაღაც გამოძიება მიმდინარეობს, რომლის თანამშრომელიც სოფოა [გელავა]", — ვკითხულობთ გიორგი ნანობაშვილის პოსტში.

ჩხრეკის შედეგად ფინანსურმა პოლიციამ წაიღო სოფო გელავას პერსონალური კომპიუტერი, პირადი ტელეფონი, გიორგი ნონიაშვილის ლეპტოპი და მათი არასრულწლოვანი შვილის ლეპტოპი.

ჩხრეკის ფაქტს სოფო გელავა ტელეკომპანია ფორმულასთან გამოეხმაურა. მისი თქმით, მის სახლში ჩხრეკა Atlantic Council-ის კონტრაქტორ კომპანიასთანაა დაკავშირებული.

სოფო გელავას თქმით, ჩხრეკა დაკავშირებულია Atlantic Council-თან, კომპანიასთან, რომელსაც ის დაკონტრაქტებული ჰყავს.

"ამიხსნეს, რომ ეს არის დაკავშირებული იმ კომპანიასთან, რომელსაც დაკონტრაქტებული ვყავარ, თუმცა, რეალურად მე ვმუშაობ ატლანტიკურ საბჭოში, ეს არის საერთაშორისო ორგანიზაცია, ამერიკაში დაფუძნებული და ჩემი საქმიანობა არის პირდაპირ დაკავშირებული დეზინფორმაციასთან, საინფორმაციო ოპერაციების კვლევასთან, რუსეთის ჩარევასთან. ამიტომ, ჩემთვის, ამ წუთას ძალიან საეჭვოა, რა ხდება და რასთან არის დაკავშირებული ეს ამბავი. უბრალოდ მითხრეს, რომ ამ კომპანიასთან არის დაკავშირებული ფინანსური გამოძიება, რეალურად, ეს არის HR კომპანია, რომელიც არის დაკონტრაქტებული ატლანტიკური საბჭოს მიერ", — აცხადებს სოფო გელავა TV პირველთან.

გიორგი ნონიაშვილის განცხადებით, ის პოლიტიკურ საქმიანობას ეწევა და მისი პირადი კომპიუტერული ტექნიკის ამოღება გაუმართლებელია, რადგან არანაირ კავშირში არ არის მისი ცოლის სამსახურებრივ საქმიანობასთან.

"არ ვარ ხოლმე მომხრე შეთქმულების თეორიების, მაგრამ ჩემი ყველა კუთვნილნი დივაისი წაიღო საგამოძიებო სამსახურმა იმ პირობებში, როცა პოლიტიკურ საქმიანობას ვეწევი და იმ პირობებში, როცა ჩემს მიერ კუთვნილი დივაისები იყო. თუნდაც ფორმალურად რომ წავიკითხოთ საგამოძიებო პროცესი, არანაირ კავშირში არ იყო, თუნდაც, ჩემი ცოლის სამსახურებრივ საქმიანობასთან კონტრაქტორ კომპანიებთან", — განაცხადა გიორგი ნონიაშვილმა ტვ პირველთან.

II ჩხრეკა

ნანობაშვილის და გელავას სახლის შემდეგ, ჩხრეკა ჩატარდა Atlantic Council-ის მეორე თანამშრომლის, ეთო ბუზიაშვილის სახლში.

მისი თქმით, საგამოძიებო სამსახურის თანამშრომლებმა ახსენეს, რომ ჩხრეკა იმ ორგანიზაციას უკავშირდება, სადაც ის მუშაობს.

"გამოკითხვაზე ვარ დაბარებული. ერთადერთი, ახსენეს, რომ აინტერესებთ ჩემი ორგანიზაცია, რომელიც არის ატლანტიკური საბჭო, ამერიკული არასამთავრობო ორგანიზაცია. ჩვენ დეტალურად ვიკვლევთ რუსეთის საინფორმაციო ოპერაციებს", — განაცხადა ეთო ბუზიაშვილმა ფორმულასთან.

ბუზიაშვილის ინფორმაციით, დაწყებულია გამოძიება 3 მუხლით: სსკ-ის 180-ე, 218-ე და 194-ე მუხლები – თაღლითობა, გადასახადებისგან თავის არიდება და ფულის გათეთრება.

III ჩხრეკა

ამის პარალელურად, იუმორისტმა ონისე ცხადაძემ სოციალურ ქსელში დაწერა, რომ მისი და მისი ძმის სახლიც გაჩხრიკეს.

"ფინანსური პოლიცია შემოვიდა დღეს ჩემთან და ჩემს ძმასთან. გარაჟის დაშენებაში გვაქვს ნაქირავები, მე ყველა ანგარიში დაყადაღებული მაქვს, ჩემს ძმას ბანკის ვალები და ჩვენთან მოვიდა ფინანსთა სამინისტროს საგამოძიებო სამსახური. ჩაატარეს ჩხრეკა, ამოიღეს ყველანაირი ტექნიკა (ერთი წლის გაფუჭებული ლეპტოპიც) ჩემი ტელეფონის გარდა. ოქმი იყო ძალიან სასაცილო. ყველაფერზე ეწერა ამოღებულია ლეპტოპი ყავისფერი ჩანთიდან, რომელიც იდო იატაკზე, ამოღებულია ტელეფონი, რომელიც იდო იატაკზე... ყველაფერი იატაკზე იდო. მაგიდა და კარადა არ გვაქვს სახლში და ფინანსური პოლიცია დაგვადგა, თან ისეთ ადგილას ვცხოვრობთ, ჩვენ თვითონ ძლივს ვაგნებთ და ამათმა საიდან გაიგეს, სად ვცხოვრობთ არ ვიცი. თანდათან გავიხსენებ კიდე", წერს ონისე ცხადაძე სოციალურ ქსელში“, — წერს ონისე ცხადაძე.

IV ჩხრეკა

რიგით მეოთხე ჩხრეკა ფინანსთა სამინისტროს საგამოძიებო სამსახურმა Concentrix Georgia-ს ოფისში ჩაატარა. ეს უკანასკნელი ამერიკული კომპანიაა, რომელიც მსხვილ ბიზნესკომპანიებს საზღვარგარეთ უწევს კონსულტაციებს.

გავრცელებული ინფორმაციით, Concentrix Georgia-ს თანამშრომლებს შეატყობინეს, რომ დღეს სამუშაო პროცესი არ იქნება, კომპანიაში მხოლოდ ოფიციალური ხელმძღვანელი პირები იმყოფებიან.

V ჩხრეკა

თბილისის გარდა, დღეს დილით ჩხრეკა ჩატარდა ქუთაისში, ვალერი ტყეშელაშვილის სახლშიც. ამის შესახებ ინფორმაციას თავად ვალერი ტყეშელაშვილი საკუთარ Facebook გვერდზე პირდაპირი ჩართვით ავრცელებს.

მოქალაქის თქმით, ის საქართველოში წლებია, არ ყოფილა და ჩხრეკა, სავარაუდოდ, მის პოლიტიკურ შეხედულებებს უკავშირდება. ტყეშელაშვილის განცხადებით, მას განემარტა, რომ ჩხრეკა ქოლ-ცენტრების ირგვლივ მიმდინარე გამოძიებას უკავშირდება