რუსეთის მხარეს მებრძოლ ჩრდილოეთკორეელ სამხედროებს კურსკში, უკრაინის სამხედრო დაზვერვის ხელმძღვანელის, კირილო ბუდანოვის ცნობით, 23 ოქტომბერს ელიან.

არსებული ცნობებით, მოსკოვი სრულმასშტაბიან აგრესიაში მოკავშირე ფხენიანის ჩართვასაც აპირებს და ამჟამად 10000 ჩრდილოეთკორეელი სამხედრო რუსეთის არმიისათვის შესაერთებლად წრთვნას გადის.

ჩრდილოეთ კორეამ უკრაინის ომში ჯარისკაცების გაგზავნა უარყო და ცნობებს "უსაფუძვლო ჭორები" უწოდა. მიუხედავად უარყოფისა, სამხედრო ჩარევის შესახებ უფრო და უფრო მეტი ცნობა ვრცელდება. რამდენიმე დღის წინ გავრცელდა ვიდეოც, რომელშიც რუსეთის სამხედრო ბაზაზე ჩრდილოეთკორეელი სამხედროები არიან აღბეჭდილი.

სამხრეთკორეული მედიის ცნობით, ფხენიანმა რუსეთს პილოტებიც კი გაუგზავნა, რომელთაც რუსული საჰაერო გამანადგურებლების მართვა შეუძლიათ. ამის საპასუხოდ ოფიციალური სეული უკრაინაში სადაზვერვო ჯგუფის გაგზავნასაც კი განიხილავს.