ბათუმელი მეზღვაურები განცხადებას ავრცელებენ და მიმართავენ კოლეგებს, რომ არ წამოეგონ პროვოკაციას, რომლის თანახმადაც წინასაარჩევნოდ ადამიანების პირადობის მოწმობები უნდა ჩამოართვან — წერს გამოცემა ბათუმელები.

"ნაკლებად გვეგულება ადამიანი ან პროფესია, რომელმაც მეზღვაურზე უკეთ იცის, რა არის თავისუფლება და რამდენად მძიმეა მისი შეზღუდვა.

დღეს საქართველო გასაყარზეა. ან უნდა დავკარგოთ მოპოვებული თავისუფლება და ისევ მარწუხებში გავზარდოთ შვილები, ან გავაგრძელოთ სწრაფი განვითარება.

უნდა გვახსოვდეს, რომ თავისუფლება არ არის მხოლოდ ჯაჭვებიდან თავის დახსნა. თავისუფლება არის ცხოვრება ისე, რომ პატივი ვცეთ და სხვათა თავისუფლება გავაძლიეროთ. ჩვენი არა მხოლოდ სურვილი, არამედ ვალდებულებაა — გავაძლიეროთ შვილების, ოჯახების, ქვეყნის თავისუფლება.

მეზღვაურის ერთ-ერთი მთავარი იარაღი სიმამაცეა. ტალღა თუ ვერ გვაშინებს, რომელიმე პოლიტიკური გუნდი, თუნდაც მმართველი — არაფერია.

არის ხმები, რომ პირადობებს ჩამოგართმევენ, დაგაშანტაჟებენ, დაგემუქრებიან… ვერ და არ! პირადობის მოწმობა თავისუფლების ერთ-ერთი სიმბოლოა და არაფრით არ უნდა გადასცეთ სხვა პირს. არც თქვენი ხმა დაუთმოთ ვინმეს! არჩევნებზე არწამსვლელი სწორედ ამას გააკეთებს და ეს დანაშაულიცაა თაობათა წინაშე.

არჩევნები არაა მხოლოდ ხმის მიცემა. ეს მომავლის გზაა და ამ გზაზე არ უნდა დაგვავიწყდეს, რომ თავისუფლების მთავარი გამოხატულება სწორედ არჩევანის ქონა და გამოყენებაა.

დიახ, ბიძინა უნდა მოიშოროს, საქართველომ! თავისუფალი საქართველო კი, თქვენ ხართ და თქვენი ოჯახები!" — ნათქვამია განცხადებაში.