ბაიდენის ადმინისტრაციამ მოითხოვა ისრაელის მთავრობისგან, შემდეგი 30 დღის განმავლობაში ღაზის სექტორში ჰუმანიტარული დახმარების ტრანსპორტირება უზრუნველყოს — წინააღმდეგ შემთხვევაში ისრაელი დაკარგავს წვდომას აშშ-ის სამხედრო დახმარების პაკეტზე.

წერილს, რომელშიც ეს მოთხოვნაა წაყენებული, აშშ-ის სახელმწიფო მდივანი, ენტონი ბლინკენი და თავდაცვის მდივანი, ლოიდ ოსტინი აწერენ ხელს.

ეს არ არის პირველი შემთხვევა, როდესაც ბაიდენის ადმინისტრაცია მსგავსი წერილით მიმართავს ისრაელის მთავრობას. იქამდე, აპრილში ენტონი ბლინკენის მიერ გაგზავნილი წერილის საფუძველზე, ისრაელმა დაუშვა პალესტინელებისთვის ჰუმანიტარული დახმარების უსაფრთხო ტრანსპორტირება. თუმცა აშშ-ის სახელმწიფო დეპარტამენტის პრესსპიკერი, მეთიუ მილერი ამბობს, რომ ეს პროცესი არ გაგრძელებულა.

"რასაც ჩვენ ვხედავთ ბოლო რამდენიმე თვის განმავლობაში ისაა, რომ ჰუმანიტარულმა დახმარებამ იკლო. ფაქტობრივად, მიწოდება 50%-ით შემცირდა. შესაბამისად, ენტონი ბლინკენმა და ლოიდ ოსტინმა საჭიროდ ჩათვალეს ისრაელის მთავრობისთვის ხაზი გაესვათ, რომ ცვლილებებია საჭირო. კერძოდ, ღაზის სექტორში ჰუმანიტარული დახმარების მიწოდების გაზრდა", — აცხადებს მეთიუ მილერი.

წერილის შესახებ განცხადება გააკეთა აშშ-ის ეროვნული უსაფრთხოების საბჭოს პრესსპიკერმაც, ჯონ კირბიმაც და აღნიშნა, რომ სამხედრო დახმარების შეწყვეტა არ არის უბრალოდ წინადადება ან შანტაჟი, არამედ ესაა გამოხატულება იმის, რომ აშშ-სთვის მნიშვნელოვანია ღაზის სექტორში ჰუმანიტარული დახმარების ზრდა.

"წერილის მიზანი მუქარა არ ყოფილა, არამედ ის მიზნად ისახავს ისრაელის მთავრობას ღაზის სექტორში ჰუმანიტარული დახმარების დრამატული ზრდის გადაუდებელი აუცილებლობა აგრძნობინოს", — აცხადებს ჯონ კირბი.