Reuters-ის ცნობით, აშშ-მა ისრაელი გააფრთხილა, რომ ამ უკანასკნელმა მომავალი თვის განმავლობაში ღაზაში ჰუმანიტარული სიტუაცია უნდა გამოასწოროს, წინააღმდეგ შემთხვევაში კი სამხედრო დახმარების შეზღუდვა ემუქრება. ეს გასულ წელს სამხედრო ოპერაციის დაწყების შემდეგ ყველაზე მკაცრი განცხადებაა.

აშშ-ის სახელმწიფო მდივანმა ენტონი ბლინკენმა და თავდაცვის მდივანმა ლოიდ ოსტინმა 13 ოქტომბერს ისრაელის ელისუფლებას ოფიციალური წერილით მიმართეს, რომელშიც პალესტინურ ანკლავში სიტუაციის გაუარესებაზე შეშფოთება გამოთქვეს.

Reuters-ს წერილის გაგზავნა დაუდასტურეს და განუცხადეს, რომ მისი ადრესატები ისრაელის თავდაცვის მინისტრი იოავ გალანტი და სტრატეგიული საქმეების მინისტრი რონ დერმერი იყვნენ. ვაშინგტონში ისრაელის საელჩომ კომენტარის გაკეთებაზე უარი თქვა.

გავრცელებული ინფორმაციით, აშშ-ის ხელისუფლებამ გადაწყვიტა, ისრაელს სარაკეტო თავდაცვის სისტემა THAAD მიაწოდოს. თუ ისრაელი არ გამოასწორებს ღაზის სექტორში არსებულ უმძიმეს ჰუმანიტარულ ვითარებას, ეს და ამ ტიპის სხვა დახმარებები კითხვის ნიშნის ქვეშ დადგება.

მეტიც, POLITICO-ს ცნობით, ისრაელის მინისტრებისათვის სანქციების დაწესებას გაერთიანებული სამეფოც გეგმავს.