დღეს, 14 ოქტომბერს, რუსეთის სახელმწიფო სააგენტო ტასს-მა ინფორმაცია გაავრცელა, სადაც იუწყება, რომ რუსეთმა, ყირიმის ხიდის აფეთქებასთან კავშირის გამო “სახელმწიფოთაშორისი ძებნა” გამოაცხადა საქართველოს მოქალაქე ალექსანდრე ინასარიძესა და უკრაინის მოქალაქე სერგეი ანდრეიჩენკოზე.

რუსეთის საგამოძიებო კომიტეტმა, ტერაქტისა და ორგანიზებული ჯგუფის მიერ ასაფეთქებელი ნივთიერებების შეძენის და კონტრაბანდის მუხლებით სისხლის სამართლის საქმე აღძრა ინასარიძსა და ანდრეიჩენკოს წინააღმდეგ.

2024 წლის მარტში, ბასმანის რაიონის სასამართლომ ალექსანდრე ინასარიძეს პატიმრობა დაუსწრებლად შეუფარდა.

რუსეთის მიერ ანექსირებული ყირიმის ხიდზე სატვირთო მანქანა 2022 წლის 8 ოქტომბერს აფეთქდა, რასაც მსხვერპლი მოჰყვა. შემთხვევა უკრაინაში რუსეთის ფართომასშტაბიანი შეჭრიდან შვიდი თვის შემდეგ მოხდა.

რუსეთის უშიშროების ფედერალურმა სამსახურმა აფეთქებიდან ოთხი დღის შემდეგ გამოაცხადა, რომ უკრაინის სამხედრო დაზვერვის მიერ “ორგანიზებული ტერაქტის” ფარგლებში, რუსეთის ხუთი, უკრაინის და სომხეთის სამი მოქალაქე დააკავე, მოგვიანებით გაირკვა, რომ მონაწილეობას საქართველოს ორი მოქალაქეც იღებდა.

რუსეთის უშიშროება იმ პერიოდში ავრცელებდა ინფორმაციას, სადაც ალექსანდრე ინასარიძე იყო მოხსენებული სანდრო ინოსარიძედ, ხოლო მეორე პირი კი ბროკერად, რომლის სახელი ლევანია.

რუსეთის საგამოძიებო მასალებში მოხსენებული სატვირთო მანქანა ინასარიძის დედას ეკუთვნოდა — წერდა ტელეკომპანია “პირველი” მომხდარის პერიოდში.

ასევე, საქართველოს მთავრობის წევრები ამტკიცებდნენ, რომ ყირიმის ხიდზე მომხდარ აფეთქებასთან საქართველოს რაიმე კავშირი არ აქვს.

2022 წლის ოქტომბერს მომხდარ აფეთქებას, რუსეთის მონაცემებით, სამი ადამიანი შეეწირა. ასევე, შემთხვევას მოჰყვა ხიდის საავტომობილო ნაწილის ნგრევაც და ძლიერი ხანძარი ხიდის სარკინიგზო ნაწილზე.

2023 წლის ივლისში, უკრაინამ ოფიციალურად დაადასტურა რომ ყირიმის ხიდზე აფეთქება მისი ორგანიზებული იყო.