სულ ახლახან შედგა პრემიერა სიმღერისა, რომლითაც საქართველო 2024 წლის საბავშვო ევროვიზიაზე წარდგება. დედას — ამ სახელწოდების კომპოზიციით საერთაშორისო მუსიკალურ ფესტივალზე ჩვენს ქვეყანას 11 წლის ანდრია ფუტკარაძე წარადგენს.

ანდრიას სიმღერის ავტორი გიგა კუხიანიძეა, რომელსაც საბავშვო ევროვიზიაზე საქართველოს სხვა არაერთი საკონკურსო კომპოზიციაც ეკუთვნის, მათ შორის, სამივე გამარჯვებული სიმღერა. კუხიანიძესთან ერთად, წლევანდელი სიმღერის ტექსტზე მაკა დავითაიამაც იმუშავა.

ქვემოთ იხილავთ ანდრიას სიმღერის კლიპს, რომელიც საზოგადოებრივმა მაუწყებელმა გადაიღო. ვიდეორგოლში გამოყენებული კოსტიუმების ავტორი იზა ნადარეიშვილია.

ანდრია ფუტკარაძემ წლევანდელ ევროვიზია ჯუნიორზე საქართველოს წარმომადგენლის სტატუსი საზოგადოებრივი მაუწყებლის პროექტ რანინას მეშვიდე სეზონში გამარჯვებით მოიპოვა. ბათუმში დაბადებულ ანდრიას სიმღერა ორი წლის ასაკში დაუწყია. ექვსი წლის ასაკიდან იგი ანსამბლ ზღვის შვილების წევრია, ამასთან, ბათუმის ზაქარია ფალიაშვილის სახელობის მუსიკალურ ექვსწლედში სწავლობს ფორტეპიანოს განხრით.

რიგით 22-ე საბავშვო ევროვიზიის სიმღერის კონკურსს ესპანეთის დედაქალაქი მადრიდი უმასპინძლებს 16 ნოემბერს. წლევანდელ საბავშვო ევროფესტივალზე მონაწილეობას 17 ქვეყანა მიიღებს, მათგან ორი კონკურსს ხანგრძლივი პაუზის შემდეგ უბრუნდება. ცნობილია ისიც, რომ ანდრია ფინალურ შოუზე მე-9 ნომრად იმღერებს.

გასულ წელს, ნიცაში გამართულ საბავშვო ევროვიზიაზე გამარჯვება ისევ საფრანგეთს ხვდა წილად: ზედიზედ მეორედ, ჯამში კი — მესამედ. როგორც წესი, მომდევნო წლის კონკურსის მასპინძლობას სწორედ გამარჯვებულ ქვეყანას სთავაზობენ, მაგრამ საფრანგეთმა, სადაც საბავშვო ევროვიზია 2021-შიც ჩატარდა, ამჯერად ეს უფლება მეორეადგილოსან ესპანეთს დაუთმო.

საქართველო კი, უკვე საფრანგეთთან ერთად, საბავშვო ევროვიზიის რეკორდსმენ ქვეყნად რჩება სამი გამარჯვებით. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამას გარდა, საქართველომ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...