საქართველოს ექს-პრეზიდენტის, მიხეილ სააკაშვილის ადვოკატმა შინაგან საქმეთა მინისტრის სავარაუდო აუდიო ჩანაწერზე გამოძიების დაწყების მოთხოვნით პროკურატურას მიმართა.

ადვოკატი, ბექა ბასილია On.ge-სთან ამბობს, რომ ახლა პროკურატურა ვალდებულია გამოკითხოს მინისტრი მღებრიშვილი, ასევე ჩაატაროს ექსპერტიზა და გასცეს პასუხები იმ კითხვებს, რომლებიც ჩანაწერს უკავშირდება.

"გიორგი მღებრიშვილის საუბარში ისმის არაერთი დანაშაულის შემცველი ინფორმაცია, მათ შორის, პირის მიმართ დევნა მისი პოლიტიკური შეხედულების გამო, უფლებამოსილების ბოროტად გამოყენება და ა.შ." - ამბობს ბასილაია.

საუბარია უკრაინულ მედიაში გავრცელებულ აუდიო ჩანაწერზე, სადაც, სავარაუდოდ, გიორგი მღებრიშვილი მიხეილ სააკაშვილს უცენზურო სიტყვებით მოიხსენიებს და ამბობს, რომ საქართველოში მის ექსტრადიციას არ მოითხოვენ.

შინაგან საქმეთა სამინისტრო უარყოფს, რომ აღნიშნული საუბარი ნამდვილად შედგა. უწყების პოზიციას იზიარებს საპარლამენტო უმრავლესობაც. მათი აზრით, ასეთი კავშირები ღია სატელეფონო ხაზით არ დგება და ჩანაწერის ავთენტურობაზე სეროზულად საუბარი არ შეიძლება.

რუსი პრენკერი, ლექსუსი კი რუსთავი 2-თან ინტერვიუში ამტკიცებს, რომ გიორგი მღებრიშვილს უკრაინის შს მინისტრის სახელით ნამდვილად ესაუბრა. მისი თქმით, ჩანაწერი ავთენტურია და ამის შემოწმება ექსპერტიზით შეიძლება.

ვინ არის რუსი პრენკერი ლექსუსი?

რამდენიმე წელია ლექსუსი, თავის პარტნიორ ვოვანთან ერთად პოპ ვარსკვლავებს, საჯარო ფიგურებს და პრეზიდენტებსაც კი სატელეფონო ზარით ასულელებს. რუსული მედიასაშუალება Meduza-ს ცნობით, მათი საქმიანობა რატომღაც მუდმივად ემსახურება რუსეთის ხელისუფლების ინტერესებს. მაგალითად, 2016 წლის მარტში ვოვანმა და ლექსუსმა ნადია სავჩენკოს წერილი გადასცეს, რომელიც თითქოს უკრაინის პრეზიდენტის ადმინისტრაციის მიერ იყო გამოგზავნილი. წერილი სავჩენკოს შიმშილობის შეწყვეტისკენ მოუწოდებდა. წერილის ავთენტურობაში დარწმუნებული არა მხოლოდ სავჩენკო, არამედ მისი ადვოკატებიც იყვნენ. ერთ-ერთმა ადვოკატმა პრენკერებს რუსული უსაფრთხოების სამსახურებთან კავშირში დასდო ბრალი, თუმცა პრენკერებმა კრემლთან თანამშრომლობა უარყვეს.

On.ge ცდილობს საქართველოს პროკურატურასთან დაკავშირებას. უწყების კომენტარს მიღებისთანავე შემოგთავაზებთ.