9 ოქტომბრიდან ჩრდილოეთ კორეა სამხრეთთან დამაკავშირებელ ყველა საავტომობილო და სარკინიგზო გზას დაკეტავს, რათა ორი ქვეყანა "სრულად განაცალკევოს".

ავტორიტარული რეჟიმის სამხედრო ძალების განცხადებით, ჩრდილოეთი დაკეტავს და დაბლოკავს სამხრეთ საზღვარს, თავის მხარეს კი გაამაგრებს.

კორეის სახალხო არმიამ (KPA) ამ გადაწყვეტილებას "ომის შესაფერხებლად აუცილებელი თავდაცვითი ზომა" უწოდა. უკმაყოფილება სამხრეთ კორეაში მიმდინარე სამხედრო წვრთნებმა და რეგიონში აშშ-ის ბირთვული ძალების გახანგრძლივებულმა ყოფნამ გამოიწვია.

ეს ორ ქვეყანას შორის ურთიერთობებში ბოლო წლების განმავლობაში უდაბლესი წერტილია.

"კორეის ნახევარკუნძულზე არსებული მწვავე სამხედრო სუტიაცია კორეის სახალხო დემოკრატიული რესპუბლიკის შეიარაღებული ძალებისგან უფრო გადამწყვეტი და მძლავრი ზომების მიღებას მოითხოვს, რათა უკეთ დავიცვათ ეროვნული უსაფრთხოება", — ვკითხულობთ KPA-ს განცხადებას სახელმწიფო მედიაგამოცემა KCNA-ში

ფხენიანის გადაწყვეტილება სიმბოლურია, რადგან ხსენებული გზები და რკინიგზა თითქმის ისედაც არ გამოიყენება.

ბოლო რამდენიმე თვეში ორი ქვეყნის საზღვარზე არაერთი ინციდენტი დაფიქსირდა. მათ შორის, 2024 წლის ივლისში ჩრდილოეთ კორეიდან სამხრეთის მიმართულებით ბუშტებით ნაგავი გაუშვეს, რომელთაგან ერთ-ერთი პრეზიდენტის რეზიდენციასთანაც ჩამოვარდა.

აღსანიშნავია, რომ 2023 წლის დასაწყისში ჩრდილოეთ კორეის ლიდერმა, კიმ ჩენ-ინმა განაცხადა, რომ სამხრეთთან გაერთიანების საკითხით დაინტერესებული აღარ იყო.