ცნობილი ბრიტანელი მწერალი და ჰარი პოტერის სამყაროს შემქმნელი ჯოან როულინგი ახალ რომანზე მუშაობს. ამჯერად, წიგნი არც ჯადოქრებზე არ იქნება და არც კერძო დეტექტივზე — როულინგის თქმით, სამეცნიერო ფანტასტიკის ჟანრის რომანის წერა დაიწყო. მწერალი ამ პროექტზე მთლიანად მას შემდეგ გადაერთვება, რაც დეტექტივების ათწიგნეულს, კორმორან სთრაიქის სერიას, ბოლომდე მიიყვანს.

ყველაფერი კი იმას მოჰყვა, რომ როულინგს სოციალურ ქსელში ჰკითხეს, აპირებს თუ არა სამომავლოდ კოსმოსური ოდისეის დაწერას.

"სთრაიქის დასრულების შემდეგ სამ სხვადასხვა წიგნზე მუშაობა შემიძლია", — უპასუხა როულინგმა, — "სამივე იმიტომ დავიწყე, რომ გამოუსწორებელი ვორკაჰოლიკი ვარ. თუმცა, პირველ რიგში რომელსაც დავასრულებ, ის სამეცნიერო ფანტასტიკაა და ვწუხვარ, მაგრამ მასში დედამიწაზე ხდება მოქმედება და არა კოსმოსში".

აი, მანამდე კი როულინგს, როგორც ვთქვით, დეტექტივების სერია აქვს დასამთავრებელი. კორმორან სთრაიქის სერიის გამოცემა მწერალმა რობერტ გელბრეითის ფსევდონიმით 2013 წელს დაიწყო. მაშინ ავტორს სურდა, თავის მორიგ რომანზე მკითხველების გულწრფელი შეფასება ისე მიეღო, რომ მათ არ სცოდნოდათ, ვინ იმალებოდა ფსევდონიმის უკან. თუმცა, როულინგის საიდუმლო მალევე გაცხადდა და სერიის პირველი წიგნიც, გუგულის ძახილი, ბესტსელერად იქცა. ამ დროისთვის როულინგს სთრაიქის შვიდი წიგნი აქვს გამოცემული. სერიის წიგნები მსოფლიოში 20 მილიონზე მეტ ეგზემპლარადაა გაყიდული და თარგმნილია 43 ენაზე, მათ შორის, ქართულად.

ფოტო: Getty Images

ჰარი პოტერის შვიდწიგნეულის დასრულების შემდეგ, როულინგმა ასევე გამოსცა ზრდასრულებისთვის განკუთვნილი რომანი შემთხვევითი ვაკანსია (2012), რომელიც, სთრაიქის სერიის მსგავსად, სერიალად იქცა. ბოლო წლებში მწერალმა ასევე გამოაქვეყნა ორი საბავშვო წიგნი: იკაბოგი (2020) და საშობაო გოჭუნა (2021).

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...