დღეს, 8 ოქტომბერს, სალომე ზურაბიშვილთან შესახვედრად, პრეზიდენტის ადმინისტრაციაში ძლიერი საქართველო, ერთიანობა-ნაციონალური მოძრაობა და გახარიას პარტიის ლიდერები მივლენ. დღის მთავარი თემა არჩევნებში ოპოზიციის გამარჯვების შემდეგ ტექნიკური მთავრობის დაკომპლექტებაა.

პრეზიდენტი, ქარტიის ხელმომწერებს, დროებით პროფესიულ მთავრობას და პრემიერს სთავაზობს, რომელმაც იმისთვის, რომ ევროკავშირმა საქართველოს მოლაპარაკებების კარი გახსნას ამისთვის სწრაფი რეფორმები უნდა გაატაროს. ოპოზიციის ის მხარე, რომელიც პრეზიდენტს ხვდება, ამ იდეას იზიარებს და ეთანხმება.

პარტიები, რომლებიც დღეს პრეზიდენტთან აპირებენ მისვლას მიიჩნევენ, რომ ზურაბიშვილთან კონსულტაცია აუცილებელია, თუმცა ფიქრობენ, რომ თანამდებობის გადანაწილება ჯერ ნაადრევია. შეხვედრები ორბელიანის სასახლეში დღის მეორე ნახევარშია ჩანიშნული.

ჩვენთვის მნიშვნელოვანია საქართველოს პრეზიდენტის როლი სახელმწიფოში, ის არის მნიშვნელოვანი ხმა ქართველი ხალხის დასავლეთში ჩვენი პარტნიორების წინაშე. ჩვენ ქარტიას მოვაწერეთ ხელი კოალიციის წევრმა პარტიებმა, შესაბამისად, დღეს ვაპირებთ, რომ პრეზიდენტთან მივიდეთ კონსულტაციაზე.

ვფიქრობთ, რომ აქტიური საარჩევნო კამპანიის პირობებში, მაშინ, როდესაც ძალიან მნიშვნელოვანია, რომ მოქალაქეებმა მოგვისმინონ, ჰქონდეთ იმედი გამარჯვების და მოგვისმინონ, რა დაპირებას ვაძლევთ მათ, რომ მართლა მივხედავთ ამ ქვეყანას 27 ოქტომბრის შემდეგ, წინასწარ კანდიდატებზე და თანამდებობებზე საუბარი არის კონტრპროდუქტიული და სასარგებლო არ არის, - ამბობს "ძლიერი საქართველოს" ერთ-ერთი ლიდერი ანა დოლიძე.

იმავე აზრზეა ერთიანობა-ნაციონალური მოძრაობის ერთ-ერთი ლიდერი — გიორგი ვაშაძე.

პირნათლად შევასრულებთ ქარტიას, იქ არის რეფორმები, იქ არის პროფესიონალებით დაკომპლექტებულ მთავრობაზე საუბარი, კოალიციურ მთავრობაზე საუბარი. თანამდებობები, ვინ რას დაიკავებს, ამის დრო არის არჩევნების შემდეგ. ეს არის ჩემი პირადი პოზიცია, მაგრამ რა თქმა უნდა, მოვუსმენ სალომე ზურაბიშვილს. ახლა, მე, მაგალითად, ვისურვებდი, რომ მასთან ერთად ყველანი მთელ საქართველოში დავდიოდეთ, ხალხს ვხვდებოდეთ, მოტივაციას ვაძლევდეთ, ვიბრძოდეთ იმ უსამართლობების წინააღმდეგ, რაც საქართველოში არის და არა შეხვედრებში ვკარგავდეთ დროს, — განაცხადა გიორგი ვაშაძემ.


ინფორმაციისთვის, პრეზიდენტმა გუშინ დაიწყო "ქართული ქარტიის" ხელმომწერ პროდასავლურ ოპოზიციურ პარტიებთან კონსულტაციები მომავალი კოალიციური, ტექნიკური მთავრობის შემადგენლობის კანდიდატურებთან დაკავშირებით.

თუ გაინტერესებს 2024 წლის საპარლამენტო არჩევნებთან დაკავშირებული მნიშვნელოვანი სიახლეები გაწევრიანდით ჯგუფში — საპარლამენტო არჩევნები 2024