ისლანდიაში, გულფოსის ჩანჩქერის მიმდებარე ტერიტორიაზე, ადამიანის ცხედარი იპოვეს. ამის შესახებ ინფორმაცია On.ge-ის საგარეო საქმეთა სამინისტროში დაუდასტურეს. უწყების განცხადებით, ისლანდიური მხარე ვარაუდობს, რომ გარდაცვლილი გულფოსის ჩანჩქერის ტერიტორიაზე, 19 ივლისს გაუჩინარებული 22 წლის ნიკა ბეგაძეა.

საგარეო უწყების ინფორმაციით, ცხედარს დღესვე ექსპერტიზაზე გადაიყვანენ, რათა მისი ვინაობა დაადგინონ. შემთხვევის შესახებ ინფორმირებულია დაკარგულის ოჯახი.

ნიკა ბეგაძე 19 ივლისს შევიდა გულფოსის ჩანჩქერში, რის შემდეგაც დაკარგულად მიიჩნევა. მისი ვინაობა იმ მანქანის საშუალებით დადგინდა, რომელიც ნაქირავები ჰქონდა.

გაუჩინარების დღიდან, მდინარესა და ჩანჩქერში სამძებრო ღონისძიებები მიმდინარეობდა, თუმცა, რთული რელიეფის გამო მისი პოვნა ვერ მოხერხდა.