საქართველოს განათლებისა და მეცნიერების მინისტრმა, ალექსანდრე ჯეჯელავამ იმედის ეთერში განაცხადა, რომ სკოლებში "ვაშლების დარიგების" კამპანია, დაახლოებით 300-დან 400 ათას ლარამდე დაჯდება.

"ეს სეზონი არის საპილოტე და ჩვენ უნდა ვნახოთ როგორ იმუშავებს ეს თბილისის დიდ სკოლებში, დაახლოებით, საუბარია 300-დან 400 ათას ლარამდე დანახარჯზე. არც ერთი დანახარჯი არ არის ზედმეტი, როდესაც ჩვენი შვილებისა და მომავალი თაობის ჯანმრთელობას ეხება", - განაცხადა მინისტრმა.

მისივე თქმით, კამპანია პირველად თბილისის დიდ სკოლებში დაიწყება, რადგან არაჯანსაღი საკვები ყველაზე მეტად პოპულარული ქალაქებსა და დიდ სკოლებშია.

განათლების მინისტრის განცხადებით, ახალი სასწავლო წლიდან იმ სკოლებში, სადაც ათასზე მეტი მოსწავლე სწავლობს, კვირაში ერთხელ მოსწავლეებს თითო ვაშლს დაურიგებენ. ამის შესახებ მინისტრმა დღეს, 11 აგვისტოს, ჟურნალისტებთან შეხვედრისას განაცხადა:

"აღნიშნული პროექტის მიზანია, რომ შემდეგ თავად მშობლებმაც გამოატანონ სახლიდან ბავშვებს ვაშლი, რაც, თავის მხრივ, ისევ ბავშვების ჯანსაღი კვებისთვის კეთდება. რეალურად, ამის ორგანიზება საკმაოდ რთულია, თუმცა, ვფიქრობთ, რომ ეს მნიშვნელოვანია და გვსურს, რომ განვახორციელოთ ეს სურვილი. ეს კამპანია დაახლოებით 40 ათასიდან 60 ათასამდე ბავშვს შეეხება, საკმაოდ რთული და ძვირი პროექტი იქნება".