88 წლის ასაკში ამერიკელი ქანთრი მომღერალი, კომპოზიტორი და მსახიობი კრის კრისტოფერსონი გარდაიცვალა.

მომღერლის გარდაცვალების შესახებ ინფორმაცია ოჯახის წევრებმა გაავრცელეს, თუმცა გარდაცვალების მიზეზი აღნიშნული არ არის.

"ჩვენ ყველა ბედნიერები ვართ მასთან გადატარებული თითოეული წუთის გამო. გმადლობთ, რომ გიყვარდათ ის მრავალი წლის განმავლობაში და მაშინ, როდესაც ცისარტყელას დაინახავთ, იცოდეთ, რომ ის ყველას გვიღიმის" — ნათქვამია ოჯახის განცხადებაში.

კრისტოფერსონის მუსიკალური კარიერა 1960-იანი წლების ბოლოს დაიწყო. 1970 წელს გამოვიდა მისი პირველი ალბომი Kristofferson. ალბომში შესული სიმღერისთვის Sunday Morning Coming Down მიიღო ამერიკული ქანთრი მუსიკის ასოციაციის ჯილდოს.

1971 წელს დაწერა სიმღერა Me and Bobby McGee, რომელიც თავდაპირველად როჯერ მილერმა შეასრულა, თუმცა უფრო პოპულარული კომპოზიცია ჯენის ჯოპლინის შესრულებით გახდა, რომელთანაც კრისტოფერსონს რომანტიკული ურთიერთობა ჰქონდა. სიმღერამ მუსიკოსს პირველი გრემი მოუტანა.

კრისტოფერსონი არაერთი ქანთრი ჰიტის ავტორია, მათ შორის არის: For the Good Times, Sunday Mornin' Comin' Down, Help Me Make It Through the Night.

სხვადასხვა დროს მიღებული აქვს 4 გრემი, 1 ოქროს გლობუსი, ქანთრი მუსიკის აკადემიის ჯილდო.

"კრის კრისტოფერსონს სჯეროდა, რომ კრეატიულობა ღვთისგანაა ნაბოძები და რომ ისინი, ვინც ამ წმინდა საჩუქარს უგულებელყოფენ ან უარყოფენ, წარუმატებლობისა და უბედურებისთვის არიან განწირულნი." — განაცხადა კაილ იანგმა.