შიმშილობის 29-ე დღეს პარლამენტის წინ მოშიმშილე შუქრუთელებს ქალებიც შეუერთდნენ, — ინფორმაციას გამოცემა პუბლიკა ავრცელებს.

"დღეს გვიერთდებიან ქალბატონები, გახდნენ იძულებული, არანაირი ყურადღება არაა არც ერთი მხრიდან, არც სახელმწიფოს, არც სახალხო დამცველის, არც საპატრიარქოს მხრიდან, აბსოლუტურად არავის მხრიდან არანაირი ყურადღება არ არის და ქალბატონები გახდნენ იძულებულები, გვიერთდებიან დღეს შიმშილობას იწყებენ", — განუცხადა "პუბლიკას" გიორგი ნეფარიძემ.

იმისთვის, რომ მოშიმშილე ქალებმა პარლამენტთან ღამე გაათიონ, რამდენიმე გასაბერი ლეიბი მიიტანეს.

პოლიციამ პროტესტის მონაწილეებს განუცხადა, რომ პარლამენტის წინ ლეიბების გაშლა არ შეიძლება.

"მოვიტანეთ რამდენიმე ლეიბი, რომ ქალებს ბეტონზე არ მოუწიოთ დაწოლა და თურმე გასაბერი ლეიბის შემოტანაც არ შეიძლება. გაიტანეთ თუ არა, ძალით გავიტანთო. ჩვენი სახლების ნგრევა ვისთანაა შეთანხმებული, მაინტერესებს. ჩვენ არანაირი კანონდარღვევა არ ჩაგვიდენია", – ამბობს ნეფარიძე.