The Wall Street Journal-ი, აშშ-ის ოფიციალურ პირებზე დაყრდნობით, ავრცელებს ინფორმაციას, რომ მიმდინარე წლის ზაფხულზე ჩინეთის უახლესი ბირთვული ენერგიით მომუშავე საესკადრო წყალქვეშა ნავი ჩაიძირა, რაც ქვეყნის ერთ-ერთი პრიორიტეტული იარაღის პროგრამისთვის სერიოზულ დარტყმად მიიჩნევა.

გამოცემის მიხედვით, ჩინეთის ხელისუფლება ამ ფაქტის დამალვას ცდილობდა და ამ დრომდე არ გამჟღავნებულა. წყაროს თქმით, შემთხვევა მაისის ბოლოს ან ივნისის დასაწყისში, ქალაქ ვუჰანთან ახლოს მდებარე გემთმშენებელ ქარხანაში, მოხდა.

WSJ-ის ინფორმაციით, ამ ეტაპზე უცნობია ჩაძირვის დროს იყო თუ არა წყალქვეშა ნავი დატვირთული ბირთვული საწვავით, თუმცა ექსპერტები ამას არ უარყოფენ.

გამოცემის თქმით, წყალქვეშა ნავი ბოლოს მაისის მიწურულს, მდინარე იანძიხში ნახეს, სადაც ნავს ზღვაში გასვლამდე შემოწმებას უტარებდნენ.

ამასთან, წყაროს თქმით, შესაძლებელია, რომ ნავის ჩაძირვასთან ერთად დაიღუპა ან დაშავდა პერსონალი. აშშ-ს ოფიციალურ პირებს მსხვერპლის შესახებ ინფორმაცია არ აქვთ.