ახალი სასწავლო წლიდან ახალგორის ბაგა-ბაღებში ქართულენოვან ჯგუფებს აუქმებენ. ბაღებში მხოლოდ რუსული და ოსურენოვანი ჯგუფები იქნება.

ქართულენოვანი სწვალების გაუქმება დე-ფაქტო მმართველს, ანატოლი ბიბილოვს ეკუთვნის. ანატოლი ბიბილოვი 9 ივნისს ახალგორის რაიონს ეწვია. მან უკმაყოფილება გამოხატა იმ ფაქტით, რომ ზოგიერთ ადგილობრივ სკოლაში სწავლება ქართულ ენაზე მიმდინარეობს და ქართული სკოლების რეგიონის საერთო სასწავლო სტანდარტზე გადაყვანის ბრძანება გასცა.

შერიგებისა და სამოქალაქო თანასწორობის საკითხებში სახელმწიფო მინისტრის, ქეთევან ციხელაშვილის თქმით, ქართველი მოსახლეობის ეთნიკური ნიშნით დისკრიმინაცია მიმდინარეობს.

"ახალგორში ცხოვრობს ეთნიკურად ქართველი მოსახლეობა, რომელსაც სურს სწავლა ქართულ ენაზე. არც პედაგოგებმა და არც მოსწავლეებმა რუსული ენა არ იციან და მათ არ სურთ რუსულ ენაზე სწავლა. ოკუპირებულ ტერიტორიებზე სწორედ ეთნიკური ნიშნით მიმდინარეობს ქართველი მოსახლეობის შევიწროება," – იმედის ეთერში განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა, ქეთევან ციხელაშვილმა.

მინისტრი ირწმუნება, რომ ოფიციალური თბილისის ძალისხმევა მიმართულია იმისკენ, რომ სწავლება ქართულ ენაზე აღდგეს და გაგრძელდეს. ხელისუფლება გეგმავს, რომ ეს საკითხი ჟენევის უახლოეს მოლაპარაკებებზე გაიტანოს.

26 ივლისს, ასევე, ცნობილი გახდა, რომ ახალგორის სკოლებში ქართულ ენაზე სწავლება აიკრძალება.

დე-ფაქტო სამხრეთ ოსეთის განათლების მინისტრის მოადგილემ, ელისო გაგლოევამ განაცხადა, რომ ქართული სკოლები რესპუბლიკის სასწავლო სტანდარტებზე გადადის. ცვლილების შედეგად, ოკუპირებულ სამხრეთ ოსეთში მცხოვრები ქართველი მოსწავლეები მშობლიურ ენას ცალკე საგნად ისწავლიან.

2015 წლის სექტემბრიდან ქართულენოვანი სწავლება გალის სკოლებშიც გაუქმდა.