ცალკე ცხოვრება გამოწვევებითაა სავსე, განსაკუთრებით მაშინ, როცა გშივდება. როგორც არ უნდა ეცადო საჭმლის გაკეთებისთვის თავის არიდებას, მოდის მომენტი, როცა ეს გარდაუვალია. მინდა, ცოტა გაგიმარტივო ეს პროცესი და გაგიზიარო სამზარეულოში ტრიალის 7 ძალა, რომლებიც მარტო ცხოვრების 7-მა წელმა შემძინა.

1. მარტივი რეცეპტების ძალა

მარტივი რეცეპტი — მაკარონი, შემწვარი კარტოფილი, სალათები და ა.შ.

ფოტო: tenor

არ არის საჭირო შეფ-მზარეული იყო, რომ კარგად იკვებო. დასაწყისისთვის რამდენიმე მარტივი რეცეპტის სწავლა დაგეხმარება. ბევრ დროს არ წაიღებს, თან პრაქტიკა მოგამზადებს სამომავლოდ უფრო სერიოზული საჭმელების საკეთებლად.

2. ნარჩენების ძალა

ნარჩენები — წინა დღეებში მომზადებული საჭმელი, ძირითადად ინახება გაყინული.

ფოტო: tenor

როგორც არ უნდა გიყვარდეს საჭმლის მომზადება, ყოველთვის არის დღეები, როცა უბრალოდ გეზარება. სწორედ ასეთი დღეებისთვისაა საგულდაგულოდ შენახული “ნარჩენები“. ცალკე ცხოვრებისას ამას უფრო დააფასებ, ვიდრე მაშინ, დედას საყინულეში ნაყინის მაგივრად გაყინული ბორში როცა გხვდებოდა.

3. აღჭურვილობის ძალა

აღჭურვილობა — სამზარეულოს აქსესუარები. მათგან გამოვყოფ ყველაზე მნიშვნელოვანს, დანას.

ფოტო: tenor

კარგ დანას შეუძლია საჭმლის მომზადება უფრო სწრაფი, უსაფრთხო და სასიამოვნო გახადოს. ვერც კი წარმოიდგენ, რამდენ დროსა და ენერგიას დაზოგავ კარგი “აღჭურვილობის“ ქონით.

4. დასუფთავების ძალა

დასუფთავება — აუცილებლად, საჭმლის კეთების პარალელურად

ფოტო: tenor

ჩემთვის საჭმლის კეთების ერთ-ერთი ყველაზე საყვარელი ნაწილი თან დალაგებაა. მოწესრიგებული სამზარეულო ამცირებს სტრესს და მომზადების პროცესს უფრო სასიამოვნოს ხდის. ბონუსად, ერთდროულად რამდენიმე საქმის კეთებაში გავარჯიშებს. ჩემი რჩევაა, არ მოიტოვოთ დალაგება ბოლოსთვის.

5. დასაწყობების ძალა

დასაწყობება — არამალფუჭებადი პროდუქტების მომარაგება(მაგ. მაკარონი, ბრინჯი, სუნელები და ა.შ.)

ფოტო: tenor

ორგანიზებული საკუჭნაო საშუალებას გაძლევს სწრაფად, მაღაზიაში გასვლის გარეშე მოამზადო კერძები. თუ ჭკვიანურად დაგეგმილი საწყობი გაქვს, არასდროს დარჩები მშიერი, დაზოგავ დროსა და ფულს. მოკლედ, მანახე შენი საკუჭნაო და გეტყვი, ვინ ხარ შენ.

6. ექსპერიმენტის ძალა


ექსპერიმენტი — შეურიე რაც გინდა, მთავარია უსაფრთხოების ნორმების დაცვით

ფოტო: tenor

მარტო ცხოვრებისას შეგიძლია თავისუფლად ჩაატარო ექსპერიმენტები და არავინ განგსჯის. ახალი ინგრედიენტების ან რეცეპტების გამოცდა არაჩვეულებრივი გასართობია და ზოგჯერ საუკეთესო კერძები მსგავსი ექსპერიმენტებიდან მოდის.

7. განწყობის ძალა

განწყობა — პროცესისადმი მიდგომა, რომელსაც შენ ირჩევ

სახლის საქმეებში შეგიძლია იპოვო სიამოვნება, მთავარია სწორად მიუდგე. აარჩიო სწორი მუსიკა, ბასრი დანა და შენი საყვარელი რეცეპტი. დამიჯერე დღის ბოლოს გემრიელი საჭმელიც გექნება და ბევრ კითხვაზე პასუხიც. საჭმლის კეთებისას ფიქრით მე, პირადად, ბევრ ცხოვრებისეულ კითხვაზე მიპასუხია.