ხურჩა-ნაბაკევის მონაკვეთზე ე.წ. მესაზღვრეებმა მავთულხლართები გააბეს. აღნიშნული შესახებ ინფორმაცია On.ge-ის სახელმწიფო უსაფრთხოების სამსახურშიც დაუდასტურეს.

ზუგდიდის რაიონში გამგებლის წარმომადგენელმა, ბადრი ხუნჯგურუამ On.ge-ის უთხრა, რომ დაახლოებით 2-ნახევარი თვის წინ, ადგილზე ხის ბოძები დაასვეს, რის შედეგადაც ოკუპირებულ ტერიტორიაზე ორ ჰექტრამდე მიწა მოექცა. მისივე თქმით, დღეს სწორედ ამ ბოძებს შორის გააბეს მავთულხლართები.

უსაფრთხოების სამსახურის შეფასებით, აღნიშნული წარმოადგენს საზღვრის უკანონო გავლების (ე.წ. ბორდერიზაციის) პროცესის გაგრძელებას, რაც არა მარტო ზღუდავს ადგილობრივი მაცხოვრებლების ფუნდამენტურ უფლებებს, არამედ პირდაპირპროპორციულად აზიანებს უსაფრთხოების გარემოს ადგილზე.

სუს-ში აცხადებენ, რომ აღნიშნული საკითხი განსახილველად დადგება 19 სექტემბერს ჩანიშნულ ინციდენტების პრევენციისა და მათზე რეაგირების ჯგუფის შეხვედრაზე გალში.