თბილისის მერი დავით ნარმანია, რომელიც ამ წუთებში მთაწმინდის ფერდობზე გაჩენილი ხანძრის მიმდებარე ტერიტორიაზე იმყოფება, ამბობს, რომ ხანძრის ძირითადი კერები ლოკალიზებულია და მისი უფრო დიდ ფართობზე გავრცელების საფრთხე არ არსებობს.

ხანძარი მთაწმინდის ფერდობზე 8 აგვისტოს, დაახლოებით, 22 საათზე გაჩნდა. რამდენიმე საათის განმავლობაში იწვოდა ტყე, არსებობდა ხანძრის დასახლებულ უბნებში გადასვლის საფრთხეც. რთული რელიეფის გამო, სახანძრო-სამაშველო ბრიგადები ცეცხლის კერამდე მისვლას ვერ ახერხებდნენ. მოსახლეობა, საპატრულო პოლიციასთან ერთად, საკუთარი ძალებით ცდილობდა ხანძრის ჩაქრობას. ისინი ცეცხლს მიწას აყრიდნენ.

ხანძრის მიმდებარე ტერიტორიაზე მობილიზებული იყო არაერთი სასწრაფო დახმარების მანქანა და სახანძრო, თუმცა, არსებული ინფორმაციით, არავინ დაშავებულა და მოსახლეობის ევაკუაცია საჭირო არ გამხდარა.